Toshkent Fotosuratlar uyida “Mening armiyam – mening faxrim!” mavzuidagi ijodiy ishlar ko‘rgazmasi va ko‘rgazma g‘oliblarini taqdirlash marosimi bo‘lib o‘tdi.
O‘zbekiston Respublikasi Qurolli Kuchlari tashkil etilganining 29 yilligi hamda 14 yanvar – Vatan himoyachilari kuni munosabati bilan tashkil etilgan tadbirda Mudofaa vazirligi mas’ullari, Qurolli Kuchlarimiz faxriylari, harbiy xizmatchilar va ularning oila a’zolari, o‘quvchi-yoshlar, keng jamoatchilik vakillari ishtirok etdi.
Ko‘rgazmada 50 nafar ijodkorning 70 ga yaqin fotosurat va saralangan ijodiy ishlari namoyish etildi.
Ko‘rgazmadan maqsad, Vatan himoyachilarining timsolini yaratish, xalq va armiya birdamligini ko‘rsatish, yosh avlodni vatanparvarlik, Vatanga sodiqlik va fidoyilik ruhida tarbiyalash, milliy armiyamizning jamiyat va davlat oldidagi ahamiyati va o‘rni, xalqimizning tinchligi, yurtimiz farovonligida harbiy xizmatchilarning hissasini keng ommaga namoyish etishdan iborat bo‘ldi.
Ijodiy ishlar Qurolli Kuchlar salohiyatini va harbiy xizmat hamda harbiy burchini tasvirlash kabi mazmuniy yo‘nalishlar bo‘yicha taniqli rassom va ijodkorlar, harbiy xizmatchilar va ularning oila a’zolari, talaba va o‘quvchi yoshlar o‘rtasida o‘tkazildi.
Tanlovga qatnashish uchun harbiy-vatanparvarlik mavzuidagi 3 ta nominatsiya – “Fotosurat, fotokollaj”, “Tasviriy san’at, grafika, miniatyura” hamda “Ko‘rgazmali targ‘ibot vositalari” bo‘yicha ishlar qabul qilindi.
Ko‘rgazma g‘oliblari O‘zbekiston Badiiy akademiyasi tomonidan tavsiya etilgan hay’at a’zolari, professional ijodkorlar tomonidan baholandi.
Yakunda, fotografiya, fotokollaj nominatsiyasida 1-o‘rin Orifjon Mamajonovga nasib etdi. E’tiborli jihati, ushbu nominatsiyada faxrli 2-o‘rinni hamkasbimiz – O‘zA fotomuxbiri Oqil G‘ulomov qo‘lga kiritdi. 3-o‘ringa Nodir Mamatqulov loyiq ko‘rildi.
Rangtasvir, grafika, miniatyura yo‘nalishida 1-o‘rin Javohir Niyozovga, 2-o‘rin Abdullo Abdug‘afforovga nasib qildi.
Ko‘rgazmali targ‘ibot plakat, panno nominatsiyasida 1-o‘ringa Aleksandr Tixomirov, 2-o‘ringa Xondamir Abdug‘aniyev va 3-o‘ringa Javohirbek Abdufattoxov munosib, deb topildi.
Shuningdek, huddi shu nominatsiyalar bo‘yicha havaskorlar o‘rtasida ham g‘olib va sovrindorlar aniqlandi.
Gulnoza BOBOEVA, Oqil G‘ulomov (Surat), O‘zA