Markaziy bank bakalavriat va magistratura talabalari uchun maxsus stipendiya tanlovini e’lon qildi.
Qayd etilishicha, mazkur tanlovda bank ishi, iqtisodiyot, buxgalteriya hisobi, moliya va axborot texnologiyalari yo‘nalishlari bo‘yicha quyidagi ta’lim muassasalarida bakalavriat (kunduzgi o‘qish shakli) so‘nggi bosqichida hamda magistratura yo‘nalishlarida ta’lim olayotgan talabalar tanlov asosida ishtirok etadi.
Xususan, Toshkent shahridagi Xalqaro Vestminster universiteti, Toshkent shahridagi Vebster universiteti, Toshkent shahridagi Singapur menejmentni rivojlantirish instituti, Toshkent davlat iqtisodiyot universiteti, Toshkent moliya instituti, Jahon iqtisodiyoti va diplomatiya universiteti, Toshkent shahridagi INXA universiteti, Mirzo Ulug‘bek nomidagi O‘zbekiston Milliy universiteti talabalar tanlov asosida ishtirok etishi mumkin.
Stipendiatlarga o‘quv jarayonida (so‘nggi o‘quv yili natijalariga ko‘ra) yuqori reyting ko‘rsatkichiga ega bo‘lishi (86% dan yuqori), davlat tilini mukammal bilishi, xorijiy tillarni (rus va ingliz) bilishi, eng kamida V2 darajasida talablar qo‘yilgan.
Hujjatlar joriy yil 13 sentyabrga qadar qabul qilinadi. Qo‘shimcha ma’lumotlarni OTMning rektorati orqali olish mumkin.
O‘zA