Poytaxtimizda o‘tkazilayotgan “Yangi O‘zbekiston: taraqqiyot, innovatsiya va ma’rifat” mavzusidagi Xalqaro sheriklik tashabbuslari haftaligi doirasida “Digital Leadership Uzbekistan 2023” xalqaro forumi bo‘lib o‘tdi.
Ushbu forum O‘zbekistonda o‘z biznesini dunyoga namoyish qilmoqchi bo‘lgan kompaniyalar ishtirok etishlari uchun zarur tadbirlardan biri hisoblanadi. Forumda 300 dan ortiq BPO (Business Process Outsourcing) va IT-autsorsing kompaniyalari, xorijiy tashkilotlar, tadbirkorlar hamda butun dunyodan 20 dan ortiq spikerlar ishtirok etmoqda. Bu kompaniyalarni IT-autsorsing va BPO xizmatlarining yetakchi provayderi sifatida targ‘ib qilishga ajoyib imkoniyat yaratadi.
— Bugungi tadbirdan ko‘zlangan asosiy maqsad yurtimizda raqamlashtirish sohasida o‘tgan yillar davomida qilingan ishlar, erishilgan natijalar hamda kelajakda rejalashtirilgan maqsadlarimiz haqida xorijiy hamkorlar, xalqaro tashkilotlar vakillarini xabardor qilishdan iborat, — deydi Elektron hukumat tizimini rivojlantirish boshqarmasi boshlig‘i Ayubxon Sultonov. — Tadbir davomida raqamli texnologiyalar vaziri Sherzod Shermatov hamda bir qator xalqaro ekspertlar o‘zlarining chiqishlari bilan ishtirok etdi.
O‘tgan yillar davomidagi bir qator islohotlar natijasida elektron hukumat, raqamli iqtisodiyot, IT ta’lim sohasida keng ko‘lamli ishlar amalga oshirildi. Vazirlik o‘z oldiga ko‘plab vazifalarni bajarishni rejalashtirib olgan. Xususan hozirda elektron xizmatlar soni, ya’ni Yagona interaktiv davlat xizmatlari portalida 440 taga yetdi. Yil oxirigacha buni 570 taga yetkazish rejalashtirilgan. Bundan tashqari ma’lumotlar almashinuvini yo‘lga qo‘yish orqali aholidan qo‘shimcha 40 tadan ortiq ma’lumotnoma so‘ralishini bekor qilish rejalashtirilgan.
Shuningdek, forumda ishtirok etayotgan tadbirkorlar o‘z kompaniyalarini namoyish etishdan tashqari, O‘zbekistondagi BPO hamda IT-autsorsing kompaniyalar bozori va sharoitlarini o‘rganish imkoniyatiga ham ega bo‘lishadi. O‘zbekiston Markaziy Osiyodagi eng jadal rivojlanayotgan IT-hablardan biri bo‘lib, forum ushbu o‘sib borayotgan bozor haqida batafsil ma’lumot olish imkoniyatini taqdim etadi.
N.Rahmonova, O‘zA