Өзбекстан Перспективалы жойбарлар миллий агентлиги ҳәм Әзербайжан Орайлық банки капитал ҳәм қамсызландырыў базарлары, крипто-активлер айланысы тараўларында бирге ислесиўди раўажландырыў, тәртипке салыў ҳәм қадағалаў бойынша өз-ара түсинисиў меморандумына қол қойды.

Атап өтилиўинше, бул ҳүжжет халықаралық илажлар, семинарлар, форумлар ҳәм тренинглерди шөлкемлестириў, онлайн ушырасыўлар ҳәм қысқа мүддетли оқыў жыйынларын өткериў, биргеликтеги илимий-изертлеў жойбарларын әмелге асырыў, сондай-ақ, тийисли тараўларда нызамшылық ҳәм статистикалық мағлыўматлар алмасыў сыяқлы бағдарлар бойынша бирге ислесиўди раўажландырыўды нәзерде тутады.

Меморандум шеңберинде инновациялық финанслық технологияларды раўажландырыў, финанслық инклюзивлик ҳәм операциялық нәтийжелиликти арттырыў, сондай-ақ, финтех-компанияларды тәртипке салыў ҳәм жаңа финанслық технологиялар бойынша ең жақсы әмелиятлар менен бөлисиў мәселелерине айрықша итибар қаратылған.

Бул бирге ислесиў еки үлке арасындағы кең көлемли байланыслардың логикалық даўамы екенин атап өтиў керек. 2025-жыл ноябрь айында Әзербайжан жетекшиси Илҳам Алиев Орайлық Азия мәмлекетлери басшыларының Мәсләҳәт ушырасыўында толық қатнасқан, декабрь айында болса мәмлекетлеримиз 2026-жылға мөлшерленген әскерий бирге ислесиў режесине қол қойған.

Ф.Яхшибоева, ӨзА