Ózbekstan Perspektivalı joybarlar milliy agentligi hám Ázerbayjan Oraylıq banki kapital hám qamsızlandırıw bazarları, kripto-aktivler aylanısı tarawlarında birge islesiwdi rawajlandırıw, tártipke salıw hám qadaǵalaw boyınsha óz-ara túsinisiw memorandumına qol qoydı.
Atap ótiliwinshe, bul hújjet xalıqaralıq ilajlar, seminarlar, forumlar hám treninglerdi shólkemlestiriw, onlayn ushırasıwlar hám qısqa múddetli oqıw jıyınların ótkeriw, birgeliktegi ilimiy-izertlew joybarların ámelge asırıw, sonday-aq, tiyisli tarawlarda nızamshılıq hám statistikalıq maǵlıwmatlar almasıw sıyaqlı baǵdarlar boyınsha birge islesiwdi rawajlandırıwdı názerde tutadı.
Memorandum sheńberinde innovaciyalıq finanslıq texnologiyalardı rawajlandırıw, finanslıq inklyuzivlik hám operaciyalıq nátiyjelilikti arttırıw, sonday-aq, fintex-kompaniyalardı tártipke salıw hám jańa finanslıq texnologiyalar boyınsha eń jaqsı ámeliyatlar menen bólisiw máselelerine ayrıqsha itibar qaratılǵan.
Bul birge islesiw eki úlke arasındaǵı keń kólemli baylanıslardıń logikalıq dawamı ekenin atap ótiw kerek. 2025-jıl noyabr ayında Ázerbayjan jetekshisi Ilham Aliev Oraylıq Aziya mámleketleri basshılarınıń Másláhát ushırasıwında tolıq qatnasqan, dekabr ayında bolsa mámleketlerimiz 2026-jılǵa mólsherlengen áskeriy birge islesiw rejesine qol qoyǵan.

F.Yaxshiboeva, ÓzA