Өзбекстан Республикасы Орайлық банки ҳәм Корея Республикасы Орайлық банки менен биргеликте Билимлер алмасыў бағдарламасы шеңберинде “Өзбекстанда төлем балансы динамикасы: тийкарғы белгилеўши факторлар, системалы қәўип-қәтерлерди баҳалаў ҳәм олардың алдын алыў бойынша кең көлемли илажлар анализи” темасында биргеликтеги изертлеў нәтийжелери бойынша халықаралық семинар шөлкемлестирилди.

Илажда Өзбекстан Республикасы Орайлық банки ҳәм Корея Республикасы Орайлық банки, сондай-ақ, Кореяның жетекши жоқары билимлендириў мәкемелериниң экспертлери ҳәм илимий хызметкерлери қатнасты.

Бул семинардың тийкарғы мақсети биргеликтеги изертлеў шеңберинде Өзбекстанда төлем балансының жағдайын кең ҳәм терең таллаўдан ибарат болды. Сондай-ақ, халықаралық алдыңғы экономикалық модельлерден пайдаланған ҳалда төлем балансының динамикамасына тәсир етиўши фундаментал факторларды анықлаў, сыртқы экономикалық қәўип-қәтерлерди баҳалаў ҳәм олардың алдын алыў механизмлерин енгизиў және жетилистириў бойынша анық пикир-усынысларды ислеп шығыўға итибар қаратылды.

Семинар шеңберинде халықаралық экспертлер тәрепинен “Төлем балансы анализи ҳәм оның тийкарғы көрсеткишлери”, “Макроэкономикалық қәўип-қәтерлерди анықлаў ҳәм баҳалаў усыллары”,  “Халықаралық тәжирийбе тийкарында нәтийжели экономикалық ҳәм институционаллық сиясий көзқараслар” темаларында презентациялар өткерилди.

Буннан тысқары, семинар Орайлық банк қәнигелери ушын аналитикалық потенциалды арттырыў, илимий ҳәм әмелий билимлерди тереңлестириў, халықаралық тәжирийбени миллий экономикалық ҳәм финанслық шараятларға муўапықластырыў имканиятларын жаратты.

Бул илаж Орайлық банктиң макроэкономикалық турақлылықты тәмийинлеў, сыртқы экономикалық қәўип-қәтерлерди алдыннан анықлаў ҳәм оларды нәтийжели басқарыў потенциалын буннан былай да беккемлеўге қаратылған болып, Өзбекстан ҳәм Корея Республикасы арасындағы профессионал ҳәм илимий бирге ислесиўди раўажландырыўға да хызмет етеди.

– Бул илаж қәнигелеримиз ушын бир қатар имканиятларды ашты, – дейди Өзбекстан Республикасы Орайлық банки Валюта тәртиби ҳәм төлем баланси департаменти бөлим баслығының орынбасары Шерзод Хайитбоев. – Төлем балансы темасындағы изертлеў ҳәзирги күнде мәмлекетимиз ушын жүдә әҳмийетли ҳәм актуал есапланады. Өзбекстан тез раўажланып атырған ҳәм қәлиплесип атырған базар экономикасына ийе мәмлекет есапланады. Экспорт ҳәм импорт, яғный ағымдағы есап балансы, мәмлекеттиң турақлы экономикалық өсимин тәмийинлеўде үлкен әҳмийетке ийе. Бизиң жәмәәтимиз ушын бул мәселе үлкен әҳмийетке ийе. Ҳәзирги есап балансы менен байланыслы машқалалар Өзбекстанның экономикалық раўажланыўына тосқынлық болмаўы керек.

Шаҳноза Маматуропова, ӨзА