Ózbekstan Respublikası Oraylıq banki hám Koreya Respublikası Oraylıq banki menen birgelikte Bilimler almasıw baǵdarlaması sheńberinde “Ózbekstanda tólem balansı dinamikası: tiykarǵı belgilewshi faktorlar, sistemalı qáwip-qáterlerdi bahalaw hám olardıń aldın alıw boyınsha keń kólemli ilajlar analizi” temasında birgeliktegi izertlew nátiyjeleri boyınsha xalıqaralıq seminar shólkemlestirildi.
Ilajda Ózbekstan Respublikası Oraylıq banki hám Koreya Respublikası Oraylıq banki, sonday-aq, Koreyanıń jetekshi joqarı bilimlendiriw mákemeleriniń ekspertleri hám ilimiy xızmetkerleri qatnastı.
Bul seminardıń tiykarǵı maqseti birgeliktegi izertlew sheńberinde Ózbekstanda tólem balansınıń jaǵdayın keń hám tereń tallawdan ibarat boldı. Sonday-aq, xalıqaralıq aldıńǵı ekonomikalıq modellerden paydalanǵan halda tólem balansınıń dinamikamasına tásir etiwshi fundamental faktorlardı anıqlaw, sırtqı ekonomikalıq qáwip-qáterlerdi bahalaw hám olardıń aldın alıw mexanizmlerin engiziw jáne jetilistiriw boyınsha anıq pikir-usınıslardı islep shıǵıwǵa itibar qaratıldı.
Seminar sheńberinde xalıqaralıq ekspertler tárepinen “Tólem balansı analizi hám onıń tiykarǵı kórsetkishleri”, “Makroekonomikalıq qáwip-qáterlerdi anıqlaw hám bahalaw usılları”, “Xalıqaralıq tájiriybe tiykarında nátiyjeli ekonomikalıq hám institucionallıq siyasiy kózqaraslar” temalarında prezentaciyalar ótkerildi.
Bunnan tısqarı, seminar Oraylıq bank qánigeleri ushın analitikalıq potencialdı arttırıw, ilimiy hám ámeliy bilimlerdi tereńlestiriw, xalıqaralıq tájiriybeni milliy ekonomikalıq hám finanslıq sharayatlarǵa muwapıqlastırıw imkaniyatların jarattı.
Bul ilaj Oraylıq banktiń makroekonomikalıq turaqlılıqtı támiyinlew, sırtqı ekonomikalıq qáwip-qáterlerdi aldınnan anıqlaw hám olardı nátiyjeli basqarıw potencialın bunnan bılay da bekkemlewge qaratılǵan bolıp, Ózbekstan hám Koreya Respublikası arasındaǵı professional hám ilimiy birge islesiwdi rawajlandırıwǵa da xızmet etedi.
– Bul ilaj qánigelerimiz ushın bir qatar imkaniyatlardı ashtı, – deydi Ózbekstan Respublikası Oraylıq banki Valyuta tártibi hám tólem balansi departamenti bólim baslıǵınıń orınbasarı Sherzod Xayitboev. – Tólem balansı temasındaǵı izertlew házirgi kúnde mámleketimiz ushın júdá áhmiyetli hám aktual esaplanadı. Ózbekstan tez rawajlanıp atırǵan hám qáliplesip atırǵan bazar ekonomikasına iye mámleket esaplanadı. Eksport hám import, yaǵnıy aǵımdaǵı esap balansı, mámlekettiń turaqlı ekonomikalıq ósimin támiyinlewde úlken áhmiyetke iye. Biziń jámáátimiz ushın bul másele úlken áhmiyetke iye. Házirgi esap balansı menen baylanıslı mashqalalar Ózbekstannıń ekonomikalıq rawajlanıwına tosqınlıq bolmawı kerek.

Shahnoza Mamaturopova, ÓzA