13-декабрь күни Бирлескен Араб Әмирликлериниң Дубай қаласында өткерилип атырған ересеклер арасындағы жәҳән чемпионатының финал беллесиўлери өткериледи.

13 салмақ категориясы бойынша өткерилетуғын финал беллесиўлеринде Өзбекстан сайланды командасының 6 боксшиси чемпионлық ушын гүрес жүргизеди. Қызық тәрепи сонда, финалға шыққан 6 боксшимиздиң барлық қарсыласлары россиялы спортшылар болып табылады.

Атап айтқанда, 51 кг салмақта Ҳасанбой Дўсматов россиялы Байр Батлаев пенен,  60 кг да Абдумалик Халоков Всеволод Шумков пенен, 67 кг да Асадхўжа Мўйдинхўжаев Евгений Кооль пенен, 80 кг да Жавоҳир Умматалиев Жамбулат Бизамов пенен, 92 кг да Тўрабек Ҳабибулаев Муслим Гаджимагомедов пенен, +92 кг да Арман Маханов Давид Суров пенен жәҳән чемпионлығы ҳәм 300 мың АҚШ доллары ушын өз-ара беллеседи.

Сондай-ақ, ертеңги финал беллесиўлеринде Россиядан 12, Қазақстаннан 4, Әзербайжан, Беларусь, Тәжикстан ҳәм Қырғызстаннан 1 боксши рингке шығады.

Адилбай Оразов,

Қарақалпақстан хабар агентлиги шолыўшысы