Самарқанд қаласында ЮНЕСКОның “Жоқары билимлендириўге байланыслы қәнигеликлерди тән алыў ҳаққындағы глобаллық конвенция”ның Өзбекстан Республикасы тәрепинен ратификацияланыўына бағышланған арнаўлы презентация болып өтти.

Ҳәзирги ўаққытта әййемги қалада даўам етип атырған ЮНЕСКО Бас конференциясының 43-сессиясы шеңберинде шөлкемлестирилген илажда шөлкемниң басшылығы ҳәм сырт елли делегациялардың билимлендириў тараўының ўәкиллери, елимиздиң жоқары билимлендириў системасының жуўапкерлери ҳәм жоқары оқыў орынларының ректорлары қатнасты.

Презентацияда ЮНЕСКО Бас директорының билимлендириў бойынша орынбасары Стефания Жаннини, Өзбекстан Республикасы жоқары билимлендириў, илим ҳәм инновациялар министри Қоңыратбай Шарипов, ЮНЕСКОның Жоқары билимлендириўге байланыслы қәнигеликлерди тән алыў ҳаққындағы глобаллық конвенция бюросының баслығы Стиг Арне Скжервен ҳәм басқалар бул конвенцияның жоқары билимлендириў тараўындағы халықаралық бирге ислесиўди беккемлеў, дипломлар ҳәм қәнигеликлерди өз-ара тән алыў процесслерин әпиўайыластырыўдағы әҳмийети ҳаққында сөз етти.

– Мәмлекетимиз жоқары билимлендириў тараўы бойынша да ЮНЕСКО менен белсене бирге ислесип келмекте, – деди Өзбекстан Республикасы жоқары билимлендириў, илим ҳәм инновациялар министри Қоңыратбай Шарипов. – Бүгинги күнде елимиздеги жоқары оқыў орынларында 8 ЮНЕСКО кафедрасы, усы шөлкем менен үйлескен 24 мектеп жумыс алып бармақта. Самарқанд қаласындағы “Жипек жолы” туризм ҳәм мәдений мийрас халықаралық университетинде 2024-жылы “Жипек жолы бойлап турақлы тарийхый туризм” ЮНЕСКО кафедрасы ашылды. Ташкент ҳәм Ферғана қалалары ЮНЕСКОның глобал билимлендириў қалалары тармағына кирген. Ҳәзирги ўақытта Самарқанд ҳәм Нөкис қалаларын да усы тармаққа қосыў бойынша жумыслар алып барылмақта. Буннан тысқары, шөлкем менен биргеликте 9,6 миллион евро баҳасындағы жумысқа жайластырыў көнликпелерин раўажландырыў жойбары әмелге асырылмақта. Усы жойбар шеңберинде Қарақалпақстан Республикасы, Бухара, Хорезм ҳәм Сурхандәрья ўәлаятларында биреўден техникум аўыл хожалығы бағдары бойынша үскенеленди. Қарақалпақстан Республикасы, Самарқанд ҳәм Наманган ўәлаятлары ҳәм Ташкент қаласында техникумлар педагогларының маманлығын арттырыў бойынша орайлар шөлкемлестирилмекте. Мәмлекетимиздиң “Жоқары билимлендириўге байланыслы қәнигеликлерди тән алыў ҳаққындағы глобаллық конвенция”ны ратификациялаўы Өзбекстанның халықаралық билимлендириў жәмийетшилигиндеги белсене қатнасыўын көрсетип, миллий дипломлар ҳәм илимий дәрежелердиң жәҳән көлеминде тән алыныўы жолында әҳмийетли басқыш болып хызмет етеди.

Илажда елимиздиң билимлендириў тараўының ўәкиллери ҳәм халықаралық экспертлер бул ҳүжжеттиң Өзбекстан миллий билимлендириў системасына енгизилиўи, халықаралық билимлендириў мәканында мәмлекетимиздиң абырайын буннан былай да арттырыўға хызмет ететуғынын айрықша атап өтти.

ӨзА