Samarqand qalasında YuNESKOnıń “Joqarı bilimlendiriwge baylanıslı qánigeliklerdi tán alıw haqqındaǵı globallıq konvenciya”nıń Ózbekstan Respublikası tárepinen ratifikaciyalanıwına baǵıshlanǵan arnawlı prezentaciya bolıp ótti.

Házirgi waqqıtta áyyemgi qalada dawam etip atırǵan YuNESKO Bas konferenciyasınıń 43-sessiyası sheńberinde shólkemlestirilgen ilajda shólkemniń basshılıǵı hám sırt elli delegaciyalardıń bilimlendiriw tarawınıń wákilleri, elimizdiń joqarı bilimlendiriw sistemasınıń juwapkerleri hám joqarı oqıw orınlarınıń rektorları qatnastı.
Prezentaciyada YuNESKO Bas direktorınıń bilimlendiriw boyınsha orınbasarı Stefaniya Jannini, Ózbekstan Respublikası joqarı bilimlendiriw, ilim hám innovaciyalar ministri Qońıratbay Sharipov, YuNESKOnıń Joqarı bilimlendiriwge baylanıslı qánigeliklerdi tán alıw haqqındaǵı globallıq konvenciya byurosınıń baslıǵı Stig Arne Skjerven hám basqalar bul konvenciyanıń joqarı bilimlendiriw tarawındaǵı xalıqaralıq birge islesiwdi bekkemlew, diplomlar hám qánigeliklerdi óz-ara tán alıw processlerin ápiwayılastırıwdaǵı áhmiyeti haqqında sóz etti.
– Mámleketimiz joqarı bilimlendiriw tarawı boyınsha da YuNESKO menen belsene birge islesip kelmekte, – dedi Ózbekstan Respublikası joqarı bilimlendiriw, ilim hám innovaciyalar ministri Qońıratbay Sharipov. – Búgingi kúnde elimizdegi joqarı oqıw orınlarında 8 YuNESKO kafedrası, usı shólkem menen úylesken 24 mektep jumıs alıp barmaqta. Samarqand qalasındaǵı “Jipek jolı” turizm hám mádeniy miyras xalıqaralıq universitetinde 2024-jılı “Jipek jolı boylap turaqlı tariyxıy turizm” YuNESKO kafedrası ashıldı. Tashkent hám Ferǵana qalaları YuNESKOnıń global bilimlendiriw qalaları tarmaǵına kirgen. Házirgi waqıtta Samarqand hám Nókis qalaların da usı tarmaqqa qosıw boyınsha jumıslar alıp barılmaqta. Bunnan tısqarı, shólkem menen birgelikte 9,6 million evro bahasındaǵı jumısqa jaylastırıw kónlikpelerin rawajlandırıw joybarı ámelge asırılmaqta. Usı joybar sheńberinde Qaraqalpaqstan Respublikası, Buxara, Xorezm hám Surxandárya wálayatlarında birewden texnikum awıl xojalıǵı baǵdarı boyınsha úskenelendi. Qaraqalpaqstan Respublikası, Samarqand hám Namangan wálayatları hám Tashkent qalasında texnikumlar pedagoglarınıń mamanlıǵın arttırıw boyınsha oraylar shólkemlestirilmekte. Mámleketimizdiń “Joqarı bilimlendiriwge baylanıslı qánigeliklerdi tán alıw haqqındaǵı globallıq konvenciya”nı ratifikaciyalawı Ózbekstannıń xalıqaralıq bilimlendiriw jámiyetshiligindegi belsene qatnasıwın kórsetip, milliy diplomlar hám ilimiy dárejelerdiń jáhán kóleminde tán alınıwı jolında áhmiyetli basqısh bolıp xızmet etedi.
Ilajda elimizdiń bilimlendiriw tarawınıń wákilleri hám xalıqaralıq ekspertler bul hújjettiń Ózbekstan milliy bilimlendiriw sistemasına engiziliwi, xalıqaralıq bilimlendiriw mákanında mámleketimizdiń abırayın bunnan bılay da arttırıwǵa xızmet etetuǵının ayrıqsha atap ótti.

ÓzA