Өзбекстан Республикасы таў-кән санааты ҳәм геология министри Бабур Исломов Түркия энергетика ҳәм тәбийғый ресурслар министриниң орынбасары Аҳмет-Берат Чонкар ҳәм Түркияның мәмлекетимиздеги айрықша ҳәм толық ҳуқықлы елшиси Уфук Улуташ пенен ушырасыў өткерди. Бул ҳаққында министрликтиң мәлимлеме хызмети хабар берди.

Сөйлесиўлер даўамында тәреплер Таў-кән санааты ҳәм геология министрлиги ҳәм Түркия минерал ресурсларды изертлеў ҳәм излеў бас басқармасы (МТА) арасында әмелге асырылып атырған биргеликтеги жойбарлар, сондай-ақ, келешектеги бирге ислесиў бағдарларын додалады. Атап айтқанда, Өзбекстанда сырт ел инвесторлары ушын жаратылып атырған қолайлы шараятлар, жер асты участкаларын аукцион арқалы ашық-айдын түрде исбилерменлерге усыныў әмелияты ҳаққында мағлыўмат берилди.

Сондай-ақ, ушырасыўда тараўға байланыслы нызамшылық базасын жетилистириў, тараўдағы реформаларды избе-из даўам еттириў ҳәм халықаралық бирге ислесиўди буннан былай да беккемлеў бойынша да пикир алысылды.

Ашық, нәтийжели ҳәм өз-ара пайдалы руўхта өткен ушырасыўда тәреплер бирге ислесиўди беккемлеўге келисип алды.

Н.Зиёдуллаева, ӨзА