Ózbekstan Respublikası taw-kán sanaatı hám geologiya ministri Babur Islomov Túrkiya energetika hám tábiyǵıy resurslar ministriniń orınbasarı Ahmet-Berat CHonkar hám Túrkiyanıń mámleketimizdegi ayrıqsha hám tolıq huqıqlı elshisi Ufuk Ulutash penen ushırasıw ótkerdi. Bul haqqında ministrliktiń málimleme xızmeti xabar berdi.

Sóylesiwler dawamında tárepler Taw-kán sanaatı hám geologiya ministrligi hám Túrkiya mineral resurslardı izertlew hám izlew bas basqarması (MTA) arasında ámelge asırılıp atırǵan birgeliktegi joybarlar, sonday-aq, keleshektegi birge islesiw baǵdarların dodaladı. Atap aytqanda, Ózbekstanda sırt el investorları ushın jaratılıp atırǵan qolaylı sharayatlar, jer astı uchastkaların aukcion arqalı ashıq-aydın túrde isbilermenlerge usınıw ámeliyatı haqqında maǵlıwmat berildi.
Sonday-aq, ushırasıwda tarawǵa baylanıslı nızamshılıq bazasın jetilistiriw, tarawdaǵı reformalardı izbe-iz dawam ettiriw hám xalıqaralıq birge islesiwdi bunnan bılay da bekkemlew boyınsha da pikir alısıldı.
Ashıq, nátiyjeli hám óz-ara paydalı ruwxta ótken ushırasıwda tárepler birge islesiwdi bekkemlewge kelisip aldı.

N.Ziyodullaeva, ÓzA