Өзбекстанда таў-кән санааты ҳәм геология тараўын раўажландырыў, стратегиялық минерал ресурсларды нәтийжели өзлестириў ҳәм халықаралық бирге ислесиўди кеңейтиў бойынша избе-из жумыслар әмелге асырылмақта.

Әсиресе, бул тармаққа сырт ел инвестицияларын тартыў ҳәм заманагөй финанслық механизмлерден пайдаланыў әҳмийетли болып есапланады.

Таў-кән санааты ҳәм геология министриниң биринши орынбасары Феруза Ҳамидова ҳәм Корея Экспорт-импорт банкиниң (The Export-Import Bank of Korea (KEXIM) Ташкенттеги ўәкилханасы ўәкиллери арасында өткерилген ушырасыўда усы мәселеге итибар қаратылды.

Онда еки тәреплеме бирге ислесиўди буннан былай да раўажландырыў, Өзбекстанның таў-кән санааты ҳәм геология тараўына инвестицияларды тартыў имканиятлары және перспективалы жойбарларды қаржыландырыў мәселелери ҳәр тәреплеме додаланды.

Сондай-ақ, тәреплер тараўда әмелге асырылып атырған реформалар, инвестициялық орталықты жақсылаўға қаратылған илажлар ҳәм халықаралық финанс институтлары менен бирге ислесиўди кеңейтиў бойынша пикир алысты.

Сөйлесиў даўамында стратегиялық әҳмийетке ийе минерал шийки зат ресурсларын өзлестириў ҳәм олардың халықаралық тәмийнат шынжырларында турақлылықты тәмийинлеў мәселесине айрықша итибар қаратылды. Бул бағдарда заманагөй технологияларды енгизиў, биргеликтеги жойбарларды әмелге асырыў ҳәм финанслық жәрдем механизмлерин кеңейтиў бойынша усыныслар алға қойылды.

Тәреплер стратегиялық минерал шийки затларды ислеп шығарыў ҳәм қайта ислеў тараўындағы перспективалы бағдарларды белгилеў, инвестициялық бирге ислесиўди беккемлеў ҳәм халықаралық тәмийнат шынжырларының турақлылығын тәмийинлеў бағдарында өз-ара бирге ислесиўди және де тереңлестириў әҳмийетли екенин атап өтти.

Ушырасыў жуўмағында келешекте бирге ислесиўди және де кеңейтиў, перспективалы инвестициялық жойбарларды әмелге асырыў ҳәм еки тәреп ушын пайдалы басламаларды қоллап-қуўатлаў бойынша өз-ара пайдалы сөйлесиўлерди даўам еттириўге келисип алынды.

Н.Зиёдуллаева,

ЎзА