Ózbekstanda taw-kán sanaatı hám geologiya tarawın rawajlandırıw, strategiyalıq mineral resurslardı nátiyjeli ózlestiriw hám xalıqaralıq birge islesiwdi keńeytiw boyınsha izbe-iz jumıslar ámelge asırılmaqta.
Ásirese, bul tarmaqqa sırt el investiciyaların tartıw hám zamanagóy finanslıq mexanizmlerden paydalanıw áhmiyetli bolıp esaplanadı.
Taw-kán sanaatı hám geologiya ministriniń birinshi orınbasarı Feruza Hamidova hám Koreya Eksport-import bankiniń (The Export-Import Bank of Korea (KEXIM) Tashkenttegi wákilxanası wákilleri arasında ótkerilgen ushırasıwda usı máselege itibar qaratıldı.
Onda eki tárepleme birge islesiwdi bunnan bılay da rawajlandırıw, Ózbekstannıń taw-kán sanaatı hám geologiya tarawına investiciyalardı tartıw imkaniyatları jáne perspektivalı joybarlardı qarjılandırıw máseleleri hár tárepleme dodalandı.
Sonday-aq, tárepler tarawda ámelge asırılıp atırǵan reformalar, investiciyalıq ortalıqtı jaqsılawǵa qaratılǵan ilajlar hám xalıqaralıq finans institutları menen birge islesiwdi keńeytiw boyınsha pikir alıstı.
Sóylesiw dawamında strategiyalıq áhmiyetke iye mineral shiyki zat resursların ózlestiriw hám olardıń xalıqaralıq támiynat shınjırlarında turaqlılıqtı támiyinlew máselesine ayrıqsha itibar qaratıldı. Bul baǵdarda zamanagóy texnologiyalardı engiziw, birgeliktegi joybarlardı ámelge asırıw hám finanslıq járdem mexanizmlerin keńeytiw boyınsha usınıslar alǵa qoyıldı.
Tárepler strategiyalıq mineral shiyki zatlardı islep shıǵarıw hám qayta islew tarawındaǵı perspektivalı baǵdarlardı belgilew, investiciyalıq birge islesiwdi bekkemlew hám xalıqaralıq támiynat shınjırlarınıń turaqlılıǵın támiyinlew baǵdarında óz-ara birge islesiwdi jáne de tereńlestiriw áhmiyetli ekenin atap ótti.
Ushırasıw juwmaǵında keleshekte birge islesiwdi jáne de keńeytiw, perspektivalı investiciyalıq joybarlardı ámelge asırıw hám eki tárep ushın paydalı baslamalardı qollap-quwatlaw boyınsha óz-ara paydalı sóylesiwlerdi dawam ettiriwge kelisip alındı.

N.Ziyodullaeva,
WzA