Торонто қаласында өткерилип атырған дүньяның ең абырайлы таў-кән ҳәм геология платформаларынан бири – “PDAC-2026” шеңберинде шөлкемлестирилген «Uzbekistan Day” илажында Өзбекстанның әҳмийетли минераллар тараўындағы потенциалы халықаралық аудиторияға көрсетилди.

Өзбекстан Республикасы Таў-кән санааты ҳәм геология министрлиги басшылығында өткерилген илажда мәмлекеттиң геологиялық имканиятлары, инвестициялық тартымлылығы және Mine–Metal–Market толық қун шынжырына тийкарланған санаат модели глобаллық жәмийетшилик ўәкиллерине усынылды.

Илажда Өзбекстанның АҚШтағы Айрықша ҳәм толық ҳуқықлы елшиси, Сыртқы ислер министрлигиниң ўәкиллери, Өзбекстан технологиялық металлар комбинатының жуўапкерлери ҳәм халықаралық экспертлер қатнасты.

«Uzbekistan Day” глобаллық таў-кән ҳәм металлургия санааты ўәкиллери тәрепинен үлкен қызығыўшылық пенен күтип алынды. Илажда 200 ге шамалас компания ҳәм институт ўәкиллери, соның ишинде, AtkinsRéalis, AGT Systems NA, Xcalibur, Global Mining Capital Corp, United States Geological Survey және European Commissionнинг критикалық шийки зат сиясаты бағдары бойынша ўәкиллери қатнасты.

Излеў геофизиклери жәмийетиниң басқарыў директоры илаж шеңберинде Өзбекстанның геологиялық ҳәм кәншилик потенциалы жоқары баҳаланғанын атап өтти. Оның сөзлерине бола, усы жылдың ақырына шекем Ташкент қаласында кәншилик тараўына бағышланған халықаралық конференция өткериў режелестирилмекте. Сондай-ақ, Өзбекстан ҳүкимети менен нәтийжели бирге ислесиўди кеңейтиў ҳәм мәмлекеттиң ресурс потенциалын жүзеге шығарыўға үлес қосыў мақсет етилгенлиги атап өтилди.

Илаж даўамында мәмлекетте әмелге асырылып атырған кең көлемли реформалар, жаңа кәнлерди өзлестириў, сийрек ушырасатуғын ҳәм технологиялық металларды терең қайта ислеў бойынша перспективалы жойбарлар ҳәм халықаралық бирге ислесиўди кеңейтиўге қаратылған басламалар усынылды.

Сондай-ақ, Өзбекстан технологиялық металлар комбинаты тәрепинен Канада компаниясы OMAD International Inc. пенен инвестицияларды тартыў ҳәм санаат бирге ислесиўин раўажландырыў бойынша меморандумға қол қойылды. Буннан тысқары, Erdenes IT LLC менен технопарклер шөлкемлестириў, биргеликтеги илимий-изертлеў басламаларын әмелге асырыў ҳәм таў-кән, геология ҳәм халықаралық маркетинг бағдарларында бирге ислесиўди нәзерде тутыўшы келисимге ерисилди.

Бул келисимлер Өзбекстанның геологиялық потенциалын жоқары қосымша қунға ийе, глобаллық базарда бәсекиге шыдамлы санаат өнимлерине айландырыўға қаратылған Mine–Metal–Market моделин халықаралық көлемде алға қойыў ҳәм мәмлекетти әҳмийетли минераллар глобаллық баҳа шынжырының әҳмийетли буўынына айландырыўға қаратылған избе-из стратегиялық қатнасты сәўлелендиреди.

ӨзА