Экономика ҳәм қаржы министрлигинде ACCA (Association of Chartered Certified Accountants) шөлкеминиң Орайлық Азия, Монголия ҳәм Армения бойынша басшысы Жанна Искенова басшылығындағы делегация менен ушырасыў болып өтти.

Онда мәмлекетимизде профессионал бухгалтер ҳәм аудиторларды халықаралық стандартлар тийкарында таярлаў, оларды сертификатлаў ҳәм аудиторлық жумыс сапасын арттырыў мәселелери додаланды.

Сөйлесиўлер даўамында 2020-жылдан берли биргеликте әмелге асырылған жумыслар жуўмақланды. Атап өтилгениндей, соңғы бес жыл даўамында 4 200 ден аслам қәнигениң халықаралық имтиханлар ҳәм оқыў қәрежетлери ушын мәмлекетлик бюджеттен 11,06 миллиард сум ажыратылған. Бул қаржылар финанслық есабат ҳәм аудит тараўында халықаралық стандартларға жуўап беретуғын кадрларды таярлаўға бағдарланған.

Президенттиң 2025-жыл 15-сентябрьдеги қарарына муўапық, 2026-2028-жыллар даўамында бухгалтерлерди халықаралық сертификатлаў шеңберинде тийисли пәнлер бойынша имтиханды табыслы тапсырған пуқаралардың дәслепки дизимнен өтиў ҳәм имтихан тапсырыў қәрежетлери республикалық бюджеттен қаплап бериледи. Бул қарар қаржы тараўында халықаралық билим ҳәм көнликпелерге ийе қәнигелердиң санын және де арттырыўға хызмет етеди.

Сондай-ақ, имтихан төлемлерине қосымша шегирмелер бериў имканиятлары, сондай-ақ, қәрежетлерди қаплаў процесинде усынылатуғын ҳүжжетлердиң ҳақыйқыйлығын жедел ҳәм исенимли тексериў механизмлерин жетилистириў мәселелери де көрип шығылды.

Министрлик мәлимлеме хызметиниң хабарына бола, ACCA – Уллы Британияда шөлкемлестирилген абырайлы халықаралық профессионал шөлкем болып есапланады. Ол 180 нен аслам мәмлекетте бухгалтер ҳәм финансшыларды таярлаў ҳәм сертификатлаў жумысын әмелге асырады.

Ушырасыў шеңберинде аудиторлық шөлкемлери жумысының сапасын қадағалаў бойынша мәсләҳәт-семинарлар шөлкемлестириў, методологиялық жәрдем көрсетиў ҳәм мәлимлеме алмасыўын күшейтиў бойынша келисимге ерисилди.

Сөйлесиўлер жуўмағында тәреплер профессионал бухгалтер ҳәм финансшыларды халықаралық стандартлар тийкарында таярлаў, имтихан системасын жетилистириў ҳәм аудиторлық жумыс сапасын арттырыў бағдарындағы бирге ислесиўди буннан былай да беккемлеўге келисип алды.

Н.Зиёдуллаева, ӨзА