Ekonomika hám qarjı ministrliginde ACCA (Association of Chartered Certified Accountants) shólkeminiń Oraylıq Aziya, Mongoliya hám Armeniya boyınsha basshısı Janna Iskenova basshılıǵındaǵı delegaciya menen ushırasıw bolıp ótti.
Onda mámleketimizde professional buxgalter hám auditorlardı xalıqaralıq standartlar tiykarında tayarlaw, olardı sertifikatlaw hám auditorlıq jumıs sapasın arttırıw máseleleri dodalandı.
Sóylesiwler dawamında 2020-jıldan berli birgelikte ámelge asırılǵan jumıslar juwmaqlandı. Atap ótilgenindey, sońǵı bes jıl dawamında 4 200 den aslam qánigeniń xalıqaralıq imtixanlar hám oqıw qárejetleri ushın mámleketlik byudjetten 11,06 milliard sum ajıratılǵan. Bul qarjılar finanslıq esabat hám audit tarawında xalıqaralıq standartlarǵa juwap beretuǵın kadrlardı tayarlawǵa baǵdarlanǵan.
Prezidenttiń 2025-jıl 15-sentyabrdegi qararına muwapıq, 2026-2028-jıllar dawamında buxgalterlerdi xalıqaralıq sertifikatlaw sheńberinde tiyisli pánler boyınsha imtixandı tabıslı tapsırǵan puqaralardıń dáslepki dizimnen ótiw hám imtixan tapsırıw qárejetleri respublikalıq byudjetten qaplap beriledi. Bul qarar qarjı tarawında xalıqaralıq bilim hám kónlikpelerge iye qánigelerdiń sanın jáne de arttırıwǵa xızmet etedi.
Sonday-aq, imtixan tólemlerine qosımsha shegirmeler beriw imkaniyatları, sonday-aq, qárejetlerdi qaplaw procesinde usınılatuǵın hújjetlerdiń haqıyqıylıǵın jedel hám isenimli tekseriw mexanizmlerin jetilistiriw máseleleri de kórip shıǵıldı.
Ministrlik málimleme xızmetiniń xabarına bola, ACCA – Ullı Britaniyada shólkemlestirilgen abıraylı xalıqaralıq professional shólkem bolıp esaplanadı. Ol 180 nen aslam mámlekette buxgalter hám finansshılardı tayarlaw hám sertifikatlaw jumısın ámelge asıradı.
Ushırasıw sheńberinde auditorlıq shólkemleri jumısınıń sapasın qadaǵalaw boyınsha másláhát-seminarlar shólkemlestiriw, metodologiyalıq járdem kórsetiw hám málimleme almasıwın kúsheytiw boyınsha kelisimge erisildi.
Sóylesiwler juwmaǵında tárepler professional buxgalter hám finansshılardı xalıqaralıq standartlar tiykarında tayarlaw, imtixan sistemasın jetilistiriw hám auditorlıq jumıs sapasın arttırıw baǵdarındaǵı birge islesiwdi bunnan bılay da bekkemlewge kelisip aldı.

N.Ziyodullaeva, ÓzA