Қарақалпақстан Республикасы Жоқарғы Кеңесиниң Баслығы Аманбай Орынбаев Беруний районында жаңа жумыс орынларын жаратыў, халықтың абадан турмысын тәмийинлеў бағдарында әмелге асырылып атырған жумыслар менен танысты.

Дәслеп, Жоқарғы Кеңес Баслығы еркин экономикалық зона аймағында 3 миллион АҚШ доллары муғдарындағы тиккелей инвестиция өзлестириў арқалы иске қосылыўы режелестирилген “JINFING SILK ROAD TRADING” ЖШЖ тәрепинен газоблок ислеп шығарыў жойбары шеңберинде әмелге асырылып атырған қурылыс жумыслары менен жақыннан танысты.

Буннан соң, ЕЭЗ аймағында жаңадан шөлкемлестирилип атырған “GLOCONITE MINERAL” ЖШЖ тәрепинен минерал төгин ислеп шығарыў, “BERUNIY AGROSTAR” ЖШЖ тәрепинен гранулаланған аралас жем ислеп шығарыў, “KONIRAT MINERAL” ЖШЖ тәрепинен балықшылық, қусшылық ҳәм шарўа азықлығы ушын қосымшалар ислеп шығарыў жойбарлары жумысларының барысы көзден өткерилди. Сондай-ақ, “Eko Agro capital” тәрепинен сырт елден алып келинген нәсилли таўықлар тийкарында әмелге асырылған мәйек жетистириў жойбары көрип шығылды. Исбилерменлердиң өз жумысын жолға қойыўы ушын жақыннан жәрдем бериў бойынша жуўапкерлерге анық тапсырмалар берилди.

Ҳүрметли Президентимиздиң арнаўлы қарары тийкарында ОПЕК халықаралық раўажланыў фондының қатнасыўында жаңадан қурылған “Шимом” мәҳәллеси ҳәм халыққа турмыслық хызмет көрсетиў орны имаратында жаратылған шараятлар барып көрилди. Аймақ турғынлары менен пикирлесип, халық ийгилиги жолындағы илажлар буннан былай да даўам еттирилетуғынлығы атап өтилди.

“Хорезм” мәҳәллеси аймағында банк балансындағы бос турған имаратта клиника шөлкемлестириў бойынша иске түсирилиўи белгиленген инвестициялық жойбар, “ERIZON” ЖШЖ кәрханасы тәрепинен әмелге асырылып атырған заманагөй саўда комплексин шөлкемлестириў жойбары, сондай-ақ, “Беруний районы қыйтақ жер хызмети” ЖШЖ тәрепинен ыссыхана шөлкемлестириў жойбары жумыслары да үйренилди.

“Әмир Темур” мәҳәллеси аймағындағы реновация бағдарламасы шеңберинде гөнерген 2 қабатлы 7 жайдың орнына заманагөй көп қабатлы турақ жайларды қурыў жойбары да барып көрилди. Қурылыс жумысларын талап дәрежесинде орынлаў бойынша тапсырмалар берилди.

Қарақалпақстан хабар агентлиги