Өзбекстан Республикасы Туризм комитети ҳәм елимизде жумыс алып барып атырған жергиликли туроператорлар менен биргеликте усы жылдың 20-22-февраль күнлери Дания Патшалығының Хернинг қаласында шөлкемлестирилген “Danish Travel Show”  халықаралық туризм ярмаркасында Өзбекстанның туризм потенциалы кеңнен көрсетилди.

Бул илаж Арқа Европа регионындағы ең ири туризм көргизбелеринен бири болып, туризм базары ўәкиллери, жетекши туроператорлар, авиакомпаниялар, мийманхана тармақлары ҳәм туризм тараўында хызмет көрсетиўши компанияларды бирден-бир платформада бирлестиреди. Ол 60 тан аслам мәмлекет ўәкиллери және мыңлаған профессионал сапар етиўшилерди қамтып алған абырайлы халықаралық “B2B” ҳәм “B2С” майданы болып есапланады.

Өзбекстан миллий стендинде мәмлекетимиздиң бай тарийхый-мәдений мийрасы, зыярат туризми, гастрономиялық бағдарлар, экологиялық ҳәм таў-қыдырыў туризми имканиятлары кеңнен үгит-нәсиятланды. Атап айтқанда, Самарқанд, Бухара, Хийўа ҳәм Ташкент қалаларының туризм имканиятлары, жаңа саяхат маршрутлары ҳәм заманагөй инфраструктура бойынша презентациялар өткерилди.

Ярмарка шеңберинде сырт елли бирге ислесиўшилер менен “B2B” ушырасыўлар шөлкемлестирилип, Арқа Европа мәмлекетлеринен Өзбекстанға туристлер ағымын арттырыў, биргеликте турпакетлер ислеп шығыў ҳәм маркетинг бирге ислесиўин кеңейтиў мәселелери додаланды. Сондай-ақ, мәмлекетимиздиң ашық ҳәм қәўипсиз туризм бағдары екени, визасыз ҳәм әпиўайыластырылған виза тәртиплери ҳаққында да ҳәр тәреплеме мағлыўмат берилди.

Бул халықаралық көргизбе Арқа Европа базарына шығыў, жаңа шериклер табыў ҳәм Өзбекстанның туризм брендин үгит-нәсиятлаў ушын әҳмийетли майдан есапланады. Онда қатнасыў мәмлекетимиздиң Европа туризм картасындағы орнын беккемлеўге, туристлер географиясын кеңейтиўге ҳәм миллий туризм экспорт потенциалын арттырыўға хызмет етеди.

Муҳайё ТОШҚОРАЕВА,
ӨзАның хабаршысы