Өзбекстан ҳәм Қытай арасында еки мәмлекет басшыларының ис-ҳәрекетлери менен өз-ара стратегиялық ҳәм дослық байланыслар избе-из раўажланбақта.

Атап айтқанда, өткен жылы 1-сентябрьде Қытайдың Тяньцзинь қаласында өткерилген ШБШ саммити шеңберинде еки мәмлекеттиң денсаўлықты сақлаў министрликлери арасында медициналық хызмет көрсетиў бойынша қол қойылған Ҳүкиметлераралық келисим бирге ислесиўди буннан былай да беккемлеўде айрықша әҳмийетке ийе болмақта.

Денсаўлықты сақлаў министри Асылбек Худаяров Қытай Халық Республикасының мәмлекетимиздеги Айрықша ҳәм толық ҳуқықлы елшиси Юй Цзюнь менен ушырасыўында әне усылар ҳаққында сөз болды.

Сондай-ақ, сөйлесиўде Республикалық суд-медициналық экспертиза илимий-әмелий орайының материаллық-техникалық базасын беккемлеў, бир қатар медицина мәкемелерин модернизациялаў ҳәм елимизде дәстүрий Қытай медицинасын раўажландырыўға қаратылған грант жойбарларын әмелге асырыў перспективалары додаланды.

Сондай-ақ, қытайлы кардиохирурглар тәрепинен усы жылы жүрек нуқсаны болған 500 наўқас балада жоқары технологиялық операциялар өткериў бойынша усыныслар көрип шығылды.

Бул әмелиятлар Балалар миллий медицина орайы, Республикалық қәнигелестирилген хирургия илимий-әмелий медицина орайы ҳәм Ташкент мәмлекетлик медицина университети балалар көп тармақлы клиникасында орынланыўы нәзерде тутылған.

Ушырасыў даўамында Қытайдың грант қаржылары есабынан әмелге асырылатуғын жойбарларды жеделлестириўге келисип алынды.

М.Қосимова, ӨзАның хабаршысы