Ózbekstan hám Qıtay arasında eki mámleket basshılarınıń is-háreketleri menen óz-ara strategiyalıq hám doslıq baylanıslar izbe-iz rawajlanbaqta.
Atap aytqanda, ótken jılı 1-sentyabrde Qıtaydıń Tyanczin qalasında ótkerilgen ShBSh sammiti sheńberinde eki mámlekettiń densawlıqtı saqlaw ministrlikleri arasında medicinalıq xızmet kórsetiw boyınsha qol qoyılǵan Húkimetleraralıq kelisim birge islesiwdi bunnan bılay da bekkemlewde ayrıqsha áhmiyetke iye bolmaqta.
Densawlıqtı saqlaw ministri Asılbek Xudayarov Qıtay Xalıq Respublikasınıń mámleketimizdegi Ayrıqsha hám tolıq huqıqlı elshisi Yuy Czyun menen ushırasıwında áne usılar haqqında sóz boldı.
Sonday-aq, sóylesiwde Respublikalıq sud-medicinalıq ekspertiza ilimiy-ámeliy orayınıń materiallıq-texnikalıq bazasın bekkemlew, bir qatar medicina mákemelerin modernizaciyalaw hám elimizde dástúriy Qıtay medicinasın rawajlandırıwǵa qaratılǵan grant joybarların ámelge asırıw perspektivaları dodalandı.
Sonday-aq, qıtaylı kardioxirurglar tárepinen usı jılı júrek nuqsanı bolǵan 500 nawqas balada joqarı texnologiyalıq operaciyalar ótkeriw boyınsha usınıslar kórip shıǵıldı.
Bul ámeliyatlar Balalar milliy medicina orayı, Respublikalıq qánigelestirilgen xirurgiya ilimiy-ámeliy medicina orayı hám Tashkent mámleketlik medicina universiteti balalar kóp tarmaqlı klinikasında orınlanıwı názerde tutılǵan.
Ushırasıw dawamında Qıtaydıń grant qarjıları esabınan ámelge asırılatuǵın joybarlardı jedellestiriwge kelisip alındı.

M.Qosimova, ÓzAnıń xabarshısı