Елимизде бәҳәр мәўсими алдынан бақланатуғын жаўын-шашын гидротехникалық объектлердиң турақлы ҳәм қәўипсиз ислеўин тәмийинлеў мәселесин қоймақта. Бул болса суў сақлағышлар, бөгетлер ҳәм гидроэлектр станцияларының жумысын үзликсиз қадағалаўды талап етеди.

Усы мүнәсибет пенен “Өзбекгидроэнерго” АЖ басқармасы баслығы Ислам Абдураҳманов басшылығында атқарыў аппаратының жуўапкер басшы-хызметкерлери ҳәм система филиаллары ҳәм шөлкемлериниң жуўапкерлери қатнасыўында видеоконференцбайланыс түринде оператив мәжилис өткерилди.

Онда жәмийет қурамындағы гидротехникалық объектлер, соның ишинде, суў сақлағышлардың бөгетлери, дәрья жағалаўларын тосыўшы объектлер, суў алыў, суў өткериў, суў таслаў ҳәм жағаларды қорғаў объектлериниң жаўын-шашынлы мәўсим шараятында қәўипсиз ислеўин тәмийинлеў мәселелери ҳәр тәреплеме додаланды.

Атап өтилгениндей, халыққа реже тийкарында үзликсиз электр энергиясын жеткерип бериўде энергия ислеп шығарыўшы кәрханалардың турақлы өндирис пәтин сақлап қалыў үлкен әҳмийетке ийе. Сонлықтан, гидроэлектр станциялары ҳәм суў сақлағышларда техникалық қурылмалардың исенимли ислеўин тәмийинлеў, нәўбетшилик хызметин күшейтиў, ҳәр бир объекттиң жумысын турақлы қадағалаў, итималлы авариялық жағдайлардың алдын алыў ушын зәрүр резерв материалларды таяр ҳалда сақлаў, сондай-ақ, машина ҳәм механизмлер және қосымша әсбап-үскенелерди таяр жағдайға келтириў бойынша анық ўазыйпалар белгилеп берилди.

Мәжилис даўамында атқарыў аппаратының барлық жуўапкер басшы-хызметкерлерине системада бириктирилген гидроэлектр станциялары ҳәм суў сақлағыш объектлерине шығып, белгиленген талаплар тийкарында ҳәр бир бағдар бойынша әмелий жумыслардың жағдайын үйрениў ҳәм қатаң қадағалаў орнатыў тапсырылды.

Илаж жуўмағында барлық жуўапкерлерге белгиленген тәртипте қатаң тапсырмалар берилип, гидротехникалық объектлердиң қәўипсиз ислеўин тәмийинлеў ҳәм энергия ислеп шығарыў турақлылығын сақлаў тийкарғы ўазыйпа екени және бир мәрте атап өтилди.

Н.Зиёдуллаева, ӨзА