Elimizde báhár máwsimi aldınan baqlanatuǵın jawın-shashın gidrotexnikalıq obektlerdiń turaqlı hám qáwipsiz islewin támiyinlew máselesin qoymaqta. Bul bolsa suw saqlaǵıshlar, bógetler hám gidroelektr stanciyalarınıń jumısın úzliksiz qadaǵalawdı talap etedi.
Usı múnásibet penen “Ózbekgidroenergo” AJ basqarması baslıǵı Islam Abdurahmanov basshılıǵında atqarıw apparatınıń juwapker basshı-xızmetkerleri hám sistema filialları hám shólkemleriniń juwapkerleri qatnasıwında videokonferencbaylanıs túrinde operativ májilis ótkerildi.
Onda jámiyet quramındaǵı gidrotexnikalıq obektler, sonıń ishinde, suw saqlaǵıshlardıń bógetleri, dárya jaǵalawların tosıwshı obektler, suw alıw, suw ótkeriw, suw taslaw hám jaǵalardı qorǵaw obektleriniń jawın-shashınlı máwsim sharayatında qáwipsiz islewin támiyinlew máseleleri hár tárepleme dodalandı.
Atap ótilgenindey, xalıqqa reje tiykarında úzliksiz elektr energiyasın jetkerip beriwde energiya islep shıǵarıwshı kárxanalardıń turaqlı óndiris pátin saqlap qalıw úlken áhmiyetke iye. Sonlıqtan, gidroelektr stanciyaları hám suw saqlaǵıshlarda texnikalıq qurılmalardıń isenimli islewin támiyinlew, náwbetshilik xızmetin kúsheytiw, hár bir obekttiń jumısın turaqlı qadaǵalaw, itimallı avariyalıq jaǵdaylardıń aldın alıw ushın zárúr rezerv materiallardı tayar halda saqlaw, sonday-aq, mashina hám mexanizmler jáne qosımsha ásbap-úskenelerdi tayar jaǵdayǵa keltiriw boyınsha anıq wazıypalar belgilep berildi.
Májilis dawamında atqarıw apparatınıń barlıq juwapker basshı-xızmetkerlerine sistemada biriktirilgen gidroelektr stanciyaları hám suw saqlaǵısh obektlerine shıǵıp, belgilengen talaplar tiykarında hár bir baǵdar boyınsha ámeliy jumıslardıń jaǵdayın úyreniw hám qatań qadaǵalaw ornatıw tapsırıldı.
Ilaj juwmaǵında barlıq juwapkerlerge belgilengen tártipte qatań tapsırmalar berilip, gidrotexnikalıq obektlerdiń qáwipsiz islewin támiyinlew hám energiya islep shıǵarıw turaqlılıǵın saqlaw tiykarǵı wazıypa ekeni jáne bir márte atap ótildi.

N.Ziyodullaeva, ÓzA