Орайлық Азия қоршаған орталық ҳәм климат өзгериўин үйрениў университетинде (“Green University”) суў ресурсларын басқарыў тараўындағы әҳмийетли мәселелер додаланды.

Гидрометеорология илимий-изертлеў институты тәрепинен “BLUE”  жойбары шеңберинде шөлкемлестирилген халықаралық ушырасыў суўдан ақылға уғрас пайдаланыўға қаратылған инновациялық шешимлерге бағышланды.

Илаж Экология ҳәм климат өзгериўи миллий комитети, Жоқары билимлендириў, илим ҳәм инновациялар министрлиги ҳәм Инновациялық раўажланыў агентлиги менен биргеликте өткерилди.

Тийкарғы тема Арал теңизи бассейнинде суўдың нәтийжелилигин арттырыў, шорланыўдың аўыл хожалығы ҳәм халықтың турмысына тәсирин баҳалаў және климатқа сәйкес технологияларды ислеп шығыўдан ибарат болды.

Қәнигелер климат өзгериўи шараятында суў ресурсларын басқарыў бойынша заманагөй илимий қолланбаларды әмелиятқа енгизиў перспективаларын додалады.

“Green University” ректоры, профессор Бахтиёр Пўлатов шығып сөйлеген сөзинде суў жетиспеўшилиги, жер деградациясы ҳәм топырақтың шорланыўы сыяқлы машқалаларды шешиўде илимий тийкарланған ҳәм климатқа сәйкес келетуғын қатнаслардың әҳмийетли екенлигин атап өтти. Ол SATREPS бағдарламасы ҳәм “BLUE” жойбары шеңбериндеги халықаралық бирге ислесиў илимий қолланбаларды әмелиятқа енгизиўде үлкен әҳмийетке ийе екенин айрықша атап өтти.

Илаж даўамында қуяш радиациясын реал ўақыт режиминде мониторинг етиў, қурғақшылықты анықлаў ҳәм бақлаў системалары, жер үсти ҳәм жасалма жолдас мағлыўматлары тийкарында қум-шаң боранларын таллаў ҳәм Арал теңизи бассейнинде суў ресурсларын басқарыў стратегиялары сыяқлы мәселелер додаланды.

Сондай-ақ, “BLUE”  жойбары шеңберинде ерисилген нәтийжелер талланып, келешектеги изертлеўлер ушын тийкарғы бағдарлар белгилеп алынды.

Илаж жуўмағында Өзбекстан Агробизнес ассоциациясы ҳәм Гидрометеорология илимий-изертлеў институты арасында бирге ислесиў меморандумына қол қойылды.

Муҳайё Тошқораева,  ӨзАның хабаршысы