Oraylıq Aziya qorshaǵan ortalıq hám klimat ózgeriwin úyreniw universitetinde (“Green University”) suw resursların basqarıw tarawındaǵı áhmiyetli máseleler dodalandı.
Gidrometeorologiya ilimiy-izertlew institutı tárepinen “BLUE” joybarı sheńberinde shólkemlestirilgen xalıqaralıq ushırasıw suwdan aqılǵa uǵras paydalanıwǵa qaratılǵan innovaciyalıq sheshimlerge baǵıshlandı.
Ilaj Ekologiya hám klimat ózgeriwi milliy komiteti, Joqarı bilimlendiriw, ilim hám innovaciyalar ministrligi hám Innovaciyalıq rawajlanıw agentligi menen birgelikte ótkerildi.
Tiykarǵı tema Aral teńizi basseyninde suwdıń nátiyjeliligin arttırıw, shorlanıwdıń awıl xojalıǵı hám xalıqtıń turmısına tásirin bahalaw jáne klimatqa sáykes texnologiyalardı islep shıǵıwdan ibarat boldı.
Qánigeler klimat ózgeriwi sharayatında suw resursların basqarıw boyınsha zamanagóy ilimiy qollanbalardı ámeliyatqa engiziw perspektivaların dodaladı.
“Green University” rektorı, professor Baxtiyor Pwlatov shıǵıp sóylegen sózinde suw jetispewshiligi, jer degradaciyası hám topıraqtıń shorlanıwı sıyaqlı mashqalalardı sheshiwde ilimiy tiykarlanǵan hám klimatqa sáykes keletuǵın qatnaslardıń áhmiyetli ekenligin atap ótti. Ol SATREPS baǵdarlaması hám “BLUE” joybarı sheńberindegi xalıqaralıq birge islesiw ilimiy qollanbalardı ámeliyatqa engiziwde úlken áhmiyetke iye ekenin ayrıqsha atap ótti.
Ilaj dawamında quyash radiaciyasın real waqıt rejiminde monitoring etiw, qurǵaqshılıqtı anıqlaw hám baqlaw sistemaları, jer ústi hám jasalma joldas maǵlıwmatları tiykarında qum-shań boranların tallaw hám Aral teńizi basseyninde suw resursların basqarıw strategiyaları sıyaqlı máseleler dodalandı.
Sonday-aq, “BLUE” joybarı sheńberinde erisilgen nátiyjeler tallanıp, keleshektegi izertlewler ushın tiykarǵı baǵdarlar belgilep alındı.
Ilaj juwmaǵında Ózbekstan Agrobiznes associaciyası hám Gidrometeorologiya ilimiy-izertlew institutı arasında birge islesiw memorandumına qol qoyıldı.

Muhayyo Toshqoraeva, ÓzAnıń xabarshısı