Испания Европа Аўқамын бирлескен армия дүзиў мәселесин қатаң көрип шығыўға шақырды. Патшалықтың сыртқы ислер министри Хосе Мануэль Альбарес бул пикирди Давостағы ушырасыўлар алдынан билдирип, структура әскерий ҳәм экономикалық басымға қарсы әззи болмаўы керек екенлигин атап өтти.

Оның пикиринше, өз алдына 27 миллий армия орнына бирден-бир әскерий механизм жаратыў бир қанша нәтийжели. Дәслеп, әййемги континент қорғаныў санааты ҳәм реал әскерий ресурслары бирлестирилиўи, кейин болса “қәлеўшилер коалициясы” қәлиплестирилиўи керек. Европалылардың бирге ҳәрекетлениў потенциалы әйне аўқам шеңберинде сезиледи.

Бул баянат Трамптың Гренландияны сатып алыў ямаса аннекция етиў ҳаққындағы қәўпи тийкарында жаңлады. Ҳәзирги ўақытта ЕА жетекшилери Брюссельде айрықша мәжилис өткерип, Вашингтонға байланыслы улыўма позицияны муўапықластырыў режесин дүзген.

Сондай-ақ, Альбарес бирден-бир армия НАТОдың орнын баспайтуғынын, тек ғана Европа өзин еркин қорғай алатуғынын көрсетиўи зәрүр екенин айтты. “Европа әскерий ямаса экономикалық миннетлемеге бойсынатуғын аймақ емес екенлигин дәлиллеўи керек”, – деген ол.

Тийкарында, Европа армиясы идеясы жаңа емес: биринши рет 1951-жылы алға сүрилген ҳәм 1954-жылы Франция парламенти тәрепинен бийкар етилген. Испания ўәкили бул мәселени “сол жойбардың жуўмақланбаған бөлеги” деп атап, ҳәзирги әўладқа тарийхый жуўапкершилик түсип атырғанын атап өтти.

Мусулмон Зиё, ӨзА