Бул ҳаққында Энергетика министрлигиниң мәлимлеме хызмети хабар берди. Оған бола, усы жылдың 11-15-январь күнлери Бирлескен Араб Әмирликлериниң Абу-Даби қаласында “Abu Dhabi Sustainability Week 2026” халықаралық форумы болып өтти.

Халықаралық әнжуманда дүньяның 150 ден аслам мәмлекетинен мәмлекетлик уйымлардың ўәкиллери, ири компаниялар ҳәм финанс институтларының басшылары қатнасып, “жасыл” экономика, климат қаржысы мәселелерин додалады.

Мәресимге Өзбекстан Республикасы Бас министриниң орынбасары Жамшид Хўжаев, энергетика министри Жўрабек Мирзамаҳмудов, Бирлескен Араб Әмирликлери Энергетика ҳәм инфраструктура министри Суҳайл Муҳаммад ал-Мазруий ҳәм “Masdar”  компаниясының бас атқарыўшы директоры Муҳаммад Жамил Ал Рамаҳий қатнасты.

Форум шеңберинде Өзбекстан Республикасы Энергетика министрлиги, “Masdar” және “Emirates Utilities Development Company” (EUDC) арасында Өзбекстанда 24/7 режиминде ислейтуғын, үзликсиз түрде 1 гигаваттқа шекемги базалық жүклеме қуўатлылығын тәмийинлейтуғын жойбарды ислеп шығыў бойынша бирге ислесиў шәртнамасына қол қойылды.

Бирге ислесиў ҳүжжетлерине “Өзэнергосатыў” акционерлик жәмийети, “Masdar” және “EtihadWater & Electricity” компаниясы тәрепинен қол қойылды.

Жойбар шеңберинде қайта тиклениўши энергия дереклери тийкарында күни-түни үзликсиз ислейтуғын, 1 гигаваттқа шекем (ГВт) қуўатлық жеткерип бериўши системаны қәлиплестириў нәзерде тутылмақта. Бул болса энергия тәмийнатының турақлылығын тәмийинлеў, бар үзилислер машқаласын сапластырыўда үлкен әҳмийетке ийе.

Қәнигелердиң атап өтиўинше, бундай форматтағы жойбарлар қайта тикленетуғын энергетика тараўында жаңа басқышты баслап береди. Соның менен бирге, ол жәҳән базарында бәсекиге шыдамлы тарифлер тийкарында үлкен көлемдеги базалық қуўатлылық ислеп шығарыў имканиятын жаратып, исенимли ҳәм экологиялық таза энергияға болған өсип баратырған талапты қанаатландырыўда халықаралық көлемде енгизилиўи мүмкин болған алдынғы үлги сыпатында хызмет етеди.

Н.Зиёдуллаева, ӨзА