Bul haqqında Energetika ministrliginiń málimleme xızmeti xabar berdi. Oǵan bola, usı jıldıń 11-15-yanvar kúnleri Birlesken Arab Ámirlikleriniń Abu-Dabi qalasında “Abu Dhabi Sustainability Week 2026” xalıqaralıq forumı bolıp ótti.
Xalıqaralıq ánjumanda dúnyanıń 150 den aslam mámleketinen mámleketlik uyımlardıń wákilleri, iri kompaniyalar hám finans institutlarınıń basshıları qatnasıp, “jasıl” ekonomika, klimat qarjısı máselelerin dodaladı.
Máresimge Ózbekstan Respublikası Bas ministriniń orınbasarı Jamshid Xwjaev, energetika ministri Jwrabek Mirzamahmudov, Birlesken Arab Ámirlikleri Energetika hám infrastruktura ministri Suhayl Muhammad al-Mazruiy hám “Masdar” kompaniyasınıń bas atqarıwshı direktorı Muhammad Jamil Al Ramahiy qatnastı.
Forum sheńberinde Ózbekstan Respublikası Energetika ministrligi, “Masdar” jáne “Emirates Utilities Development Company” (EUDC) arasında Ózbekstanda 24/7 rejiminde isleytuǵın, úzliksiz túrde 1 gigavattqa shekemgi bazalıq júkleme quwatlılıǵın támiyinleytuǵın joybardı islep shıǵıw boyınsha birge islesiw shártnamasına qol qoyıldı.
Birge islesiw hújjetlerine “Ózenergosatıw” akcionerlik jámiyeti, “Masdar” jáne “EtihadWater & Electricity” kompaniyası tárepinen qol qoyıldı.
Joybar sheńberinde qayta tikleniwshi energiya derekleri tiykarında kúni-túni úzliksiz isleytuǵın, 1 gigavattqa shekem (GVt) quwatlıq jetkerip beriwshi sistemanı qáliplestiriw názerde tutılmaqta. Bul bolsa energiya támiynatınıń turaqlılıǵın támiyinlew, bar úzilisler mashqalasın saplastırıwda úlken áhmiyetke iye.
Qánigelerdiń atap ótiwinshe, bunday formattaǵı joybarlar qayta tiklenetuǵın energetika tarawında jańa basqıshtı baslap beredi. Sonıń menen birge, ol jáhán bazarında básekige shıdamlı tarifler tiykarında úlken kólemdegi bazalıq quwatlılıq islep shıǵarıw imkaniyatın jaratıp, isenimli hám ekologiyalıq taza energiyaǵa bolǵan ósip baratırǵan talaptı qanaatlandırıwda xalıqaralıq kólemde engiziliwi múmkin bolǵan aldınǵı úlgi sıpatında xızmet etedi.

N.Ziyodullaeva, ÓzA