Олий Мажлис Сенатына Саудия Арабстаны Патшалығының Өзбекстандағы Айрықша ҳәм толық ҳуқықлы елшиси Юсуф ал-Утайбий келди.

Сенат Баслығы Танзила Норбоева менен ушырасыўда кейинги жыллары еки мәмлекет арасындағы сиясий сөйлесиў жеделлескени, жоқары дәрежедеги өз-ара сапарлар турақлы түрге енип атырғаны атап өтилди. Өзбекстан Президентиниң Саудия Арабстанына мәмлекетлик сапары, сондай-ақ, халықаралық ҳәм регионаллық саммитлер шеңбериндеги ушырасыўлар стратегиялық шерикликти беккемлеўге хызмет етпекте.

Парламентлераралық бирге ислесиўди раўажландырыў, дослық топарларының жумысын және де жеделлестириў, тәжирийбе алмасыў ҳәм өз-ара сапар етиўлерди кеңейтиў әҳмийетли екенлигине итибар қаратылды.

Саўда-экономикалық ҳәм инвестициялық бирге ислесиў тараўында әмелий нәтийжелерге ерисилмекте. Соның ишинде, инвестициялық жойбарлар портфели сезилерли дәрежеде кеңейди. Энергетика тараўында, атап айтқанда, қайта тиклениўши энергия дереклери бойынша ири биргеликтеги жойбарлар әмелге асырылмақта.

Мәдений-гуманитарлық бағдардағы бирге ислесиў, денсаўлықты сақлаў тараўында әмелге асырылып атырған биргеликтеги илажлар, сондай-ақ, Ҳаж ҳәм Умра зыяратларын шөлкемлестириўде жаратылып атырған қолайлы шараятлар еки халық арасындағы дослықты беккемлемекте.

Өзбекстанда қурылған Ислам цивилизациясы орайы ислам мәдений мийрасын үйрениўде үлкен әҳмийетке ийе. Орай менен илимий изертлеўлер алып барыў, халықаралық әнжуманларды өткериўде бирге ислесиўди күшейтиў бойынша пикир алысылды.

Өзбекстан ҳәм Саудия Арабстаны арасындағы қатнасықлар барлық бағдарларда, соның ишинде, парламентлераралық бирге ислесиўде избе-из раўажланып атырғаны қанаатланыўшылық пенен атап өтилди. Тәреплер өз-ара пайдалы бирге ислесиўди буннан былай да беккемлеў жолында ҳәрекетлерди даўам еттириўге таяр екенин билдирди.

Н.Абдураимова,

ӨзА