Oliy Majlis Senatına Saudiya Arabstanı Patshalıǵınıń Ózbekstandaǵı Ayrıqsha hám tolıq huqıqlı elshisi Yusuf al-Utaybiy keldi.

Senat Baslıǵı Tanzila Norboeva menen ushırasıwda keyingi jılları eki mámleket arasındaǵı siyasiy sóylesiw jedelleskeni, joqarı dárejedegi óz-ara saparlar turaqlı túrge enip atırǵanı atap ótildi. Ózbekstan Prezidentiniń Saudiya Arabstanına mámleketlik saparı, sonday-aq, xalıqaralıq hám regionallıq sammitler sheńberindegi ushırasıwlar strategiyalıq sheriklikti bekkemlewge xızmet etpekte.
Parlamentleraralıq birge islesiwdi rawajlandırıw, doslıq toparlarınıń jumısın jáne de jedellestiriw, tájiriybe almasıw hám óz-ara sapar etiwlerdi keńeytiw áhmiyetli ekenligine itibar qaratıldı.
Sawda-ekonomikalıq hám investiciyalıq birge islesiw tarawında ámeliy nátiyjelerge erisilmekte. Sonıń ishinde, investiciyalıq joybarlar portfeli sezilerli dárejede keńeydi. Energetika tarawında, atap aytqanda, qayta tikleniwshi energiya derekleri boyınsha iri birgeliktegi joybarlar ámelge asırılmaqta.
Mádeniy-gumanitarlıq baǵdardaǵı birge islesiw, densawlıqtı saqlaw tarawında ámelge asırılıp atırǵan birgeliktegi ilajlar, sonday-aq, Haj hám Umra zıyaratların shólkemlestiriwde jaratılıp atırǵan qolaylı sharayatlar eki xalıq arasındaǵı doslıqtı bekkemlemekte.
Ózbekstanda qurılǵan Islam civilizaciyası orayı islam mádeniy miyrasın úyreniwde úlken áhmiyetke iye. Oray menen ilimiy izertlewler alıp barıw, xalıqaralıq ánjumanlardı ótkeriwde birge islesiwdi kúsheytiw boyınsha pikir alısıldı.
Ózbekstan hám Saudiya Arabstanı arasındaǵı qatnasıqlar barlıq baǵdarlarda, sonıń ishinde, parlamentleraralıq birge islesiwde izbe-iz rawajlanıp atırǵanı qanaatlanıwshılıq penen atap ótildi. Tárepler óz-ara paydalı birge islesiwdi bunnan bılay da bekkemlew jolında háreketlerdi dawam ettiriwge tayar ekenin bildirdi.

N.Abduraimova,
ÓzA