Елимизде мийнет еткен адамның халық ушын ислеген хызметлери ҳеш қашан итибардан шетте қалмаған. Әсиресе, Президентимиздиң айрықша итибары менен ҳәр бир тараў пидайысының хызметлери мүнәсип баҳаланып, хошаметленип келинбекте.

“Аўыл хожалығы хызметкерлери күни” мүнәсибети менен Ҳүрметли Президентимиздиң жоқары мәмлекетлик сыйлықлары менен сыйлықланғанлар арасында, Беруний районы Бийбазар аўыл пуқаралар жыйыны аймағында 30 жылдан аслам пиллешилик пенен шуғылланып киятырған Гүлбәҳәр Юсупова да бар. Оған берилген “Өзбекстан Республикасына хызмет көрсеткен пиллекеш” атағы пүткил Қарақалпақстанлы пиллекешлер ушын берилген жоқары баҳа болды.

Негизги кәсиби муғаллим болған Г.Юсупова қосымша түрде өз үйинде пилле жетистириў менен шуғылланады. Шаңарақ ағзалары менен  аўызбиршиликте алып барылған  мийнетлери нәтийжесинде быйылғы 2025-жылы 1 тонна 100 кг пилле тапсырып, “”KKR Jipek klaster”  менен дүзилген шәртнама режесин артығы менен орынлаўға еристи.

Ташкент қаласына барып, Президентимиз тәрепинен сыйлықланып қайтқан Гүлбәҳәрдиң қуўанышы шексиз.

– Отыз жылдан бери шаңарақ ағзаларымыз бенен биргеликте жипек қуртын бағыў ҳәм пилле жетистириў менен шуғылланып келмектемиз. Бизлерге кластер тәрепинен он алты коробка жипек қурты бериледи, реже 900 кг болатуғын болса, бизлер режени бир тоннадан аслам етип орынлап киятырмыз. Районның ең шетки аўылында жасап, мийнет етип атырған биз пиллекешлердиң мийнетлерин итибарсыз қалдырмай, мүнәсип сыйлықлағаны ушын ҳүрметли Президентимизге миннетдаршылығым шексиз, – дейди ол.

Елимизде пиллешилик тараўына берип атырған итибар сондай-ақ, бул бағдарда мийнет етип атырған  ҳаял-қызлардың мийнетлериниң  мүнәсип баҳаланатуғынын Гүлбәҳәрдиң мысалында және бир мәрте гүўасы болдық. Бул мәмлекетлик сыйлық оны және де мийнет сүйгишликке, елимизге хызмет етиўдей уллы ислерге руўхландырмақта.

                                                 Г.Турдышова, Қарақалпақстан хабар агентлиги