Elimizde miynet etken adamnıń xalıq ushın islegen xızmetleri hesh qashan itibardan shette qalmaǵan. Ásirese, Prezidentimizdiń ayrıqsha itibarı menen hár bir taraw pidayısınıń xızmetleri múnásip bahalanıp, xoshametlenip kelinbekte.

“Awıl xojalıǵı xızmetkerleri kúni” múnásibeti menen Húrmetli Prezidentimizdiń joqarı mámleketlik sıylıqları menen sıylıqlanǵanlar arasında, Beruniy rayonı Biybazar awıl puqaralar jıyını aymaǵında 30 jıldan aslam pilleshilik penen shuǵıllanıp kiyatırǵan Gúlbáhár Yusupova da bar. Oǵan berilgen “Ózbekstan Respublikasına xızmet kórsetken pillekesh” ataǵı pútkil Qaraqalpaqstanlı pillekeshler ushın berilgen joqarı baha boldı.
Negizgi kásibi muǵallim bolǵan G.Yusupova qosımsha túrde óz úyinde pille jetistiriw menen shuǵıllanadı. Shańaraq aǵzaları menen awızbirshilikte alıp barılǵan miynetleri nátiyjesinde bıyılǵı 2025-jılı 1 tonna 100 kg pille tapsırıp, “”KKR Jipek klaster” menen dúzilgen shártnama rejesin artıǵı menen orınlawǵa eristi.
Tashkent qalasına barıp, Prezidentimiz tárepinen sıylıqlanıp qaytqan Gúlbáhárdiń quwanıshı sheksiz.
– Otız jıldan beri shańaraq aǵzalarımız benen birgelikte jipek qurtın baǵıw hám pille jetistiriw menen shuǵıllanıp kelmektemiz. Bizlerge klaster tárepinen on altı korobka jipek qurtı beriledi, reje 900 kg bolatuǵın bolsa, bizler rejeni bir tonnadan aslam etip orınlap kiyatırmız. Rayonnıń eń shetki awılında jasap, miynet etip atırǵan biz pillekeshlerdiń miynetlerin itibarsız qaldırmay, múnásip sıylıqlaǵanı ushın húrmetli Prezidentimizge minnetdarshılıǵım sheksiz, – deydi ol.
Elimizde pilleshilik tarawına berip atırǵan itibar sonday-aq, bul baǵdarda miynet etip atırǵan hayal-qızlardıń miynetleriniń múnásip bahalanatuǵının Gúlbáhárdiń mısalında jáne bir márte gúwası boldıq. Bul mámleketlik sıylıq onı jáne de miynet súygishlikke, elimizge xızmet etiwdey ullı islerge ruwxlandırmaqta.

G.Turdıshova, Qaraqalpaqstan xabar agentligi