Әдиллик министрлиги Стационар медицина мәкемелериндеги наўқасларды медициналық көрсетпеге муўапық басқа медицина мәкемесине өткериў тәртиби ҳаққындағы режени дизимнен өткерди.

Режеге бола, наўқасларға зәрүр қәнигелестирилген медициналық жәрдемди өз ўақтында толық көрсетиўди тәмийинлеў мақсетинде олар бир медицина мәкемесинен басқа медицина мәкемесине өткериледи.

Наўқаслар басқа медицина мәкемесине өткериў процесинде медицина мәкемесин зәрүр медициналық жәрдем көрсетиў имканиятына ийе болған медицина мәкемелери арасынан еркин таңлаў ҳуқықына ийе. Қалаберди, басқа медицина мәкемесине өткериў шыпакер тәрепинен берилген медициналық көрсетпе тийкарында әмелге асырылады.

Наўқаслар ушын зәрүр медициналық үскенелер ямаса қәнигелер болмағанда, сондай-ақ, қәнигелестирилген медициналық жәрдем басқа медицина мәкемесинде көрсетилсе, медициналық көрсетпе бериледи.

Басқа медицина мәкемесине өткериўден алдын наўқасларды қабыл етиўши медицина мәкемесиниң бос орынлары, зәрүр медициналық үскенелер, қәнигелер бар екенлиги анықланады. Наўқаслар өмирлик көрсеткишлери турақлы ҳалда, шыпакер бақлаўында басқа медицина мәкемесине бийпул өткериледи.

ӨзА