Таў-кән санааты ҳәм геология тараўы мәмлекеттиң экономикалық раўажланыўында үлкен әҳмийетке ийе болып, заманагөй технологиялар ҳәм алдынғы программалық тәмийнатлардан пайдаланыў нәтийжелилик ҳәм билимлендириўдиң сапасын арттырыўға хызмет етеди. Усы мақсетте, халықаралық компаниялар менен бирге ислесиў арқалы жаңа билим ҳәм технологияларды алып кириў айрықша әҳмийетке ийе.

Таў-кән санааты ҳәм геология министрлигинде министрдиң биринши орынбасары Феруза Ҳамидова ҳәм SLB компаниясының вице-президенти Кари Энн Х.Кюолаас-Холланд басшылығындағы делегация ўәкиллери арасында өткерилген ушырасыўда бул ҳаққында сөз болды.

Онда “Өзбекгеофизика” АЖ трансформация процесслерин жедел даўам еттириў, SLB менен Геология илимлери университетинде билимлендириў процесслеринде бирге ислесиў, углеводород шийки заты кәнлерин модельлестириў бойынша оқыў бағдарламасын әмелге асырыў бойынша сөйлесиўлер алып барылды.

SLB – АҚШта тийкарланған халықаралық нефть ҳәм геология технологиялары компаниясы болып, дүнья бойлап 120 дан аслам мәмлекетте жумыс алып барады. Соған бола, тәреплер арасындағы перспективалы бирге ислесиў ҳәр тәреплеме әмелий әҳмийетке ийе.

Буннан соң бирге ислесиў шеңберинде GFU басшылары менен де ушырасыў өткерилип, SLB компаниясы тәрепинен университет ушын баҳасы 11 миллион АҚШ долларын қурайтуғын арнаўлы программалық тәмийнат комплекси академиялық лицензиясы бийпул усынылды. Сондай-ақ, SLB компаниясының арнаўлы программалық тәмийнатларынан академиялық мақсетлерде пайдаланыў ушын мөлшерленген оқыў ханасы пайдаланыўға тапсырылды.

Министрлик мәлимлеме хызметиниң хабарына бола, бул бирге ислесиў Геология илимлери университетиниң билимлендириў процесслерин заманагөй технологиялар менен байытып ғана қоймастан, ал мәмлекеттиң таў-кән ҳәм геология тараўында илимий-изертлеў жумысын раўажландырыў ҳәм халықаралық стандартларға бейимлестириўге де хызмет етеди.

Н.Зиёдуллаева, ӨзА