Усы сыяқлы айырым сораўлардың жуўабы өзи менен болады.

Бул абырайлы илаж себепли Самарқандта сырт елли мийманлардың саны кескин артты. Елимиз ҳаққында анық түсиникке ийе болған инсанлардың көбейиўи де үлкен нәтийже есапланады.

Усы күнлерде мийманханаларда бос орынлар аз қалды. Қалада ҳәрекет және де жанланды. Бул болса тәбийий жағдай. Әҳмийетлиси, Самарқанд және дүнья дыққат орайында тур.

Бундай үлкен әнжуманды өткериў аңсат емес. Бул тек ғана шөлкемлестириў сынағы емес, ал мәмлекеттиң имканиятларының әмелий көриниси болып есапланады. Сол себепли, процесстиң әҳмийетин халықлық усылда түсиндириўге ҳәрекет етемиз.

Дүнья жүзиндеги 190 нан аслам мәмлекет ўәкиллери ҳәр еки жылда бир мәрте ЮНЕСКО Бас конференциясы шеңберинде жыйналады. Бул билимлендириў, илим ҳәм мәденият мәселелери бойынша алып барылатуғын ең ири халықаралық сөйлесиўлерден бири болып есапланады.

Быйылғы сессия соңғы 40 жыл ишинде биринши мәрте Парижден тысқарыда – Самарқандта өтпекте. Бул жағдай Өзбекстанның халықаралық абырайы ҳәм мәдений потенциалына билдирилген жоқары исеним, пүткил Орайлық Азия ушын болса тарийхый ўақыя болып есапланады.

ЮНЕСКО Бас директоры Одри Азуле ушын бул сессия басшы сыпатындағы соңғысы болса, оның орнын жақында сайланған египетли қәниге Холид Ал-Ананий ийелейди. Демек, Самарқанд халықаралық шөлкем тарийхында әҳмийетли бурылыс ноқатына айланбақта.

Конференцияның Самарқандта өткерилиўи қаланың дүнья мәденияты ҳәм цивилизациясының орайы сыпатындағы абырайын және де беккемлейди. Соның менен бирге, халықаралық форумлар ушын жаратылған инфраструктура, логистика ҳәм сервис тараўлары да өзиниң нәтийжелилигин және бир мәрте дәлиллемекте.

ЮНЕСКО Бас конференциясының Самарқандта өткерилиўи тек ғана мәдений ямаса сиясий ўақыя емес. Оның экономикалық тәсири де сезилерли. Делегатлар, журналистлер ҳәм ҳәр қыйлы тараў қәнигелериниң келиўи туризм тараўына жаңа түртки береди. Сөзимиздиң басында атап өткенимиздей, Самарқанд бренди және де күшейди. Ол халықаралық әнжуманлар ушын турақлы майдан сыпатындағы абырайын беккемлемекте.

Бундай илажлар мәмлекет ҳаққындағы исенимли орталық образын күшейтеди. Бул болса тиккелей инвестициялар ушын психологиялық тийкар жаратады. ЮНЕСКО арқалы билимлендириў, илим ҳәм инновация бағдарларында жаңа халықаралық жойбарларға қаржы тартыў имканиятлары кеңейеди.

Бул илаждың ең әҳмийетли тәрепи материаллық емес. Ҳәр бир делегат, ҳәр бир баянат, ҳәр бир мәдений бағдарлама инсан ой-пикирин ҳәм мәнаўиятын байытыўға хызмет етеди.

ӨзА