Ҳәр бир миллеттиң миллий көркем өнери оның ғәзийнеси болып есапланады. Ол кеше ямаса бүгин емес, узақ тарийхтан қәлиплесип келеди. Соның ушын да тап байрақ сыяқлы ол да сол халықтың белгиси сыпатында көринеди. Бизиң мине, усындай миллий көркем өнеримиз бул – мақам.

Жәҳән музыкасында ҳәр қыйлы атқарыў жоллары болып, ҳәр бири өз усылы, қурамалылығы менен бир-биринен ажыралып турады. Мысалы, Ҳинд рагасы, Әзербайжан муғамы ҳәм басқалар. Тәбийғый, көркем өнер шеберлери тек ғана өз тилинде емес, ал басқа тиллерде қосық айтыў бойынша да өзлерин сынап көреди. Бунда өзге миллеттиң тиккелей мәденияты, қалаберсе, миллий көркем өнериниң атқарыў шеберлигин үйрениў үлкен әҳмийетке ийе.

-Бизиң көркем өнер шеберлеримиз, әсиресе, жаслар, қәлеген тилде шеберлик пенен қосық атқара алады. Муғом ҳәм раганы, түрк ҳәм иран тилин, ҳәттеки, Европа көркем өнер мектебиниң шығармаларын да жоқары дәрежеде атқаратуғын талантлы атқарыўшыларымыз баршылық.

Бирақ бизиң мақамымызды ҳеш бир халық көркем өнер ғайраткери жетилисип атқара алмайды. Бул болса оның қаншелли қурамалы ҳәм тартымлы екенлигин билдиреди, – дейди Өзбекстан халық артисти Абдуҳошим Исмоилов.

Солай болса да, бүгинги күнде жасларымыздың мақамға болған мүнәсибети бираз өзгергендей. Әлбетте, ҳәр бир дәўирдиң өз қосығы, сүйикли көркем өнер ийеси болады. Бирақ, дәреже мәселеси ҳәзирги көркем өнеримиздиң аўырыўлы ноқаты десек, алжаспаған боламыз.

Миллий көркем өнеримиздиң келешеги мәмлекетимиз басшысының итибарында екени адамды қуўандырады. Оның халықаралық көлемде де абырайын және де арттырыў, жаслар қәлбинде мақамға болған сүйиспеншиликти қәлиплестириў мақсетинде Президентимиздиң басламасы менен халықаралық мақам фестиваллары өткерилип келинбекте. Соның нәтийжесинде көплеген талантлар ашылып, устазлардың мийрасы жас әўладқа мүнәсип үгит-нәсиятланбақта.

Шербек Исломов, ӨзА