Германияның Франкфурт қаласында өткерилип атырған “Frankfurter Buchmesse” халықаралық китап көргизбе-ярмаркасында өзбек әдебиятының сайланды үлгилери Өзбекстан экспозициясында көрсетилмекте.

Бул абырайлы көргизбе дүньядағы ең ири ҳәм әҳмийетли халықаралық илажлардан болып есапланады. Ол 1949-жылдан берли авторлар, баспалар, полиграфия кәрханалары, китап саўдасы шөлкемлери, әдебий агентликлер ҳәм китап ықласбентлерин бир мәнзилде, яғный Франкфурт қаласында жәмлейди.

Быйылғы көргизбеде 92 ден аслам мәмлекеттен келген қатнасыўшы компаниялардың көргизбе стендлери көрсетилмекте.

140 тан аслам мәмлекеттиң экспертлери, мыңнан аслам шығарма авторлары қатнаспақта. Көргизбе-ярмаркаға 230 мыңнан аслам китап ықласбентлериниң келиўи күтилмекте.

Бул халықаралық илаждың ҳүрметли мийманы Филиппин мәмлекети болып, өзиниң мәденияты, әдебияты, көркем өнери ҳәм китап санаатының соңғы жетискенликлери ҳаққында презентация етеди.

Өзбекстан экспозициясында “Өзбекстан”, “Янги аср авлоди”, “Credoprint”, “Asian book house”, “Global books”, “Ёшлар матбуоти”, “Дунё нашр”, “Китоб сайёраси”, “Ёш куч” басылымы ҳәм “Ўздавкитобсавдо”  шөлкеминиң ўәкиллери, авторлар (балалар жазыўшысы Мадина Мўминова) өзбек әдебияты үлгилерин көрсетиў менен бир қатарда, сырт ел баспалары ҳәм китап авторлары менен әдебий бирге ислесиў байланысларын да орнатпақта.

Н.Усмонова,

ӨзА