Түркияның Анталия қаласы жанындағы еки мың жыллық әййемги Рим амфитеатры – Аспендос және көркем өнер ықласбентлериниң дыққат орайында болды.

32-Халықаралық опера ҳәм балет фестивалы өзиниң бай бағдарламасы ҳәм жоқары көркемлик дәрежеси менен дүнья көлеминде үлкен итибарға ийе болды. Фестиваль дәслеп 1994-жылы шөлкемлестирилген болып, 1998-жылы халықаралық статусқа ийе болды ҳәм 2003-жылы Европа фестивальлар ассоциациясына ағза болды. 2004-жылы болса дүньяның ең жақсы 10 опера фестивальлары арасында 5-орынды алды.

Фестивальдың тийкарғы сахнасы – эрамыздың II әсиринде қурылған ҳәм өзиниң жетик акустикасы менен белгили болған Аспендос театры. Бул тарийхый архитектуралық комплекс ҳәр бир спектакльге бийтәкирарлық бағышлайды.

Быйылғы фестиваль бағдарламасында үш опера ҳәм үш балет көрсетилди. Фестиваль Пуччинидиң белгили “Турандот” операсы менен ашылды ҳәм онда дүньяға белгили солистлер қатнасты. Кейинги күнлерде тамашагөйлер “Зорба”, “Лабединое озеро”, “Дон Кихот” сыяқлы балетлер ҳәм “Тоска” операсын тамаша етиў имканиятына ийе болды.

Ең үлкен дыққат фестивальдың жабылыў күнине туўра келди. Орайлық Азиядан биринши мәрте Әлийшер Наўайы атындағы Өзбекстан мәмлекетлик академиялық үлкен театры толық труппасы менен қатнасты ҳәм Жузеппе Вердидиң “Травиата” операсы менен фестивальды жуўмақлады.

Режиссёр Константин Каминин сахналастырған спектакльде белгили дирижёр Вячеслав Чернухо-Волич оркестрге басшылық етти. Белгили солистлер Латифа Абийева, Рамиз Усмонов ҳәм Раҳим Мирзакамалов сыяқлы атқарыўшылар тамашагөйлер тәрепинен үлкен алғысларға еристи.

Басқа мәмлекетлерден тийкарынан өз алдына белгили солистлер мирәт етилсе, Өзбекстан театры толық жәмәәти менен қатнасыўы Орайлық Азия мәдений турмысы ушын тарийхый ўақыя болды.

Фестиваль даўамында әййемги театрдың 13 мың орынлық залында 8 мыңға шамалас тамашагөй спектакльлерден заўықланды. “Травиата”ның Өзбекстан жәмәәтиниң атқарыўындағы презентациясы көркем өнер ықласбентлериниң кеўлинен терең орын алды.

Усы тәризде, Өзбекстан мәмлекетлик академиялық үлкен театры абырайлы Аспендос фестивалында биринши мәрте қатнасып, халықаралық майданда өзбек көркем өнерин мүнәсип көрсетти ҳәм мәдениятымыздың абырайын беккемледи.

Н.Усмонова, ӨзАның хабаршысы