Túrkiyanıń Antaliya qalası janındaǵı eki mıń jıllıq áyyemgi Rim amfiteatrı – Aspendos jáne kórkem óner ıqlasbentleriniń dıqqat orayında boldı.

32-Xalıqaralıq opera hám balet festivalı óziniń bay baǵdarlaması hám joqarı kórkemlik dárejesi menen dúnya kóleminde úlken itibarǵa iye boldı. Festival dáslep 1994-jılı shólkemlestirilgen bolıp, 1998-jılı xalıqaralıq statusqa iye boldı hám 2003-jılı Evropa festivallar associaciyasına aǵza boldı. 2004-jılı bolsa dúnyanıń eń jaqsı 10 opera festivalları arasında 5-orındı aldı.
Festivaldıń tiykarǵı saxnası – eramızdıń II ásirinde qurılǵan hám óziniń jetik akustikası menen belgili bolǵan Aspendos teatrı. Bul tariyxıy arxitekturalıq kompleks hár bir spektaklge biytákirarlıq baǵıshlaydı.
Bıyılǵı festival baǵdarlamasında úsh opera hám úsh balet kórsetildi. Festival Puchchinidiń belgili “Turandot” operası menen ashıldı hám onda dúnyaǵa belgili solistler qatnastı. Keyingi kúnlerde tamashagóyler “Zorba”, “Labedinoe ozero”, “Don Kixot” sıyaqlı baletler hám “Toska” operasın tamasha etiw imkaniyatına iye boldı.
Eń úlken dıqqat festivaldıń jabılıw kúnine tuwra keldi. Oraylıq Aziyadan birinshi márte Áliysher Nawayı atındaǵı Ózbekstan mámleketlik akademiyalıq úlken teatrı tolıq truppası menen qatnastı hám Juzeppe Verdidiń “Traviata” operası menen festivaldı juwmaqladı.
Rejissyor Konstantin Kaminin saxnalastırǵan spektaklde belgili dirijyor Vyacheslav CHernuxo-Volich orkestrge basshılıq etti. Belgili solistler Latifa Abiyeva, Ramiz Usmonov hám Rahim Mirzakamalov sıyaqlı atqarıwshılar tamashagóyler tárepinen úlken alǵıslarǵa eristi.
Basqa mámleketlerden tiykarınan óz aldına belgili solistler mirát etilse, Ózbekstan teatrı tolıq jámááti menen qatnasıwı Oraylıq Aziya mádeniy turmısı ushın tariyxıy waqıya boldı.
Festival dawamında áyyemgi teatrdıń 13 mıń orınlıq zalında 8 mıńǵa shamalas tamashagóy spektakllerden zawıqlandı. “Traviata”nıń Ózbekstan jámáátiniń atqarıwındaǵı prezentaciyası kórkem óner ıqlasbentleriniń kewlinen tereń orın aldı.
Usı tárizde, Ózbekstan mámleketlik akademiyalıq úlken teatrı abıraylı Aspendos festivalında birinshi márte qatnasıp, xalıqaralıq maydanda ózbek kórkem ónerin múnásip kórsetti hám mádeniyatımızdıń abırayın bekkemledi.

N.Usmonova, ÓzAnıń xabarshısı