Бүгин Орайлық Азия халықаралық институты (ОАХИ) басламасы менен Шанхай халықаралық изертлеў институты (ШХИИ) жәрдеминде “Өзбекстан – Қытай бирге ислесиўи: “Орайлық Азия – Қытай Халық Республикасы” ҳәм Шанхай бирге ислесиў шөлкеми форматларындағы имканиятлар” темасында дөгерек сәўбети өткериледи.

Ушырасыўға еки мәмлекет дипломатиялық корпус ўәкиллериниң, сондай-ақ, жетекши таллаў орайлары, жоқары билимлендириў мәкемелери ўәкиллериниң қатнасыўы күтилмекте.

Бул илаж тәреплерге еки платформа шеңбериндеги стратегиялық бирге ислесиўди ҳәр тәреплеме таллаў имканиятын береди. Додалаўлар ўақтында Астана ҳәм Тяньцзинде өткерилген саммитлердиң нәтийжеси, бул әнжуманлардың Орайлық Азиядағы регионаллық бирге ислесиў ҳәм турақлы раўажланыў процесине тәсири үйрениледи.

Сөйлесиў шеңберинде қатнасыўшылар сиясий, экономикалық, мәдений ҳәм гуманитарлық тараўлардағы бирге ислесиўдиң ҳәзирги жағдайы ҳәм перспективаларын көрип шығады. Додалаўлар регионаллық қәўипсизликти беккемлеў, эксперт топарларын раўажландырыў, жаслар басламаларын қоллап-қуўатлаў ҳәм турақлы өсиў механизмин жетилистириў сыяқлы әҳмийетли мәселелерди қамтып алады.

Илаж жуўмағында ОАХИ ҳәм ШХИИ арасындағы бирге ислесиў көлемин буннан былай да кеңейтиўди нәзерде тутатуғын Меморандумға қол қойылыўы режелестирилген.

Ғ.Хонназаров, ӨзА