Олий Мажлис Сенатына Малайзия Сенаты Баслығының орынбасары Нур Жазлан Муҳаммад басшылығындағы парламент делегациясы келди.

Сенат Баслығы Танзила Норбоева менен ушырасыўда Өзбекстан ҳәм Малайзия арасындағы дослық қатнасықлары, көп тәреплемели бирге ислесиў ҳәм парламентлераралық байланысларды раўажландырыў мәселелери додаланды.

Парламентлераралық бирге ислесиўди беккемлеў, турақлы сөйлесиў ҳәм нызамшылық тараўында тәжирийбе алмасыўдың әҳмийетли екенлиги атап өтилди.

Парламентлераралық дослық топарларының сөйлесиўин жеделлестириў ҳәм турақлы мәжилислерди өткериў, онда мәмлекет басшылары ҳәм ҳүкиметлераралық ерисилген келисимлердиң орынланыўы бойынша тәсиршең парламентлик қадағалаўды күшейтиў бойынша бирге ислесиўди жолға қойыў, турақлы сөйлесиў ҳәм мәжилислерди өткериў бойынша усыныслар билдирилди.

Еки халық арасында улыўма тарийх, дин, үрп-әдет ҳәм қәдириятларға тийкарланған әзелий байланыслар бар екенлиги атап өтилди. Мәмлекет басшылары арасындағы ашық ҳәм конструктивлик сөйлесиў еки тәреплеме қатнасықларды раўажландырыўға беккем тийкар болып атырғаны атап өтилди.

Саўда-экономикалық ҳәм инвестициялық байланысларды кеңейтиў, билимлендириў, туризм ҳәм басқа да тараўларда биргеликтеги жойбарларды әмелге асырыў мәселелери додаланды. Малайзияның жетекши билимлендириў мәкемелери менен биргеликтеги бағдарламаларды жолға қойыў, билимлендириў форумларын шөлкемлестириў бойынша усыныслар билдирилди.

Ислам ҳәм мәденият тараўларындағы изертлеўлер бағдарындағы бирге ислесиў, атап айтқанда, Ислам цивилизациясы орайы ҳәм Халықаралық ислам академиясының Малайзия илимий мәкемелери менен байланыслары унамлы баҳаланды. Малайзияда өткерилип атырған Өзбекстан мәденияты күнлериниң әҳмийети айрықша атап өтилди.

Ушырасыў жуўмағында тәреплер парламентлераралық қатнасықларды буннан былай да раўажландырыўға таяр екенин билдирди.

Н.Абдураимова, ӨзА