Дүнья шахмат ықласбентлериниң итибарын Самарқандқа қаратқан “Grand Swiss-2025”тиң 5-турына Нодирбек Абдусатторов ҳәм түркиялы Ягиз Каан Эрдогмуш қарсылығындағы ойында бурынғы жәҳән чемпионы Рустам Қосимжоновтың символикалық дана қойыўы менен старт берилди.

Кеше өткерилген бул турда ўатанласымыз Нодирбек Абдусатторов ақ даналарда ҳәрекет еткен болса да, түркиялы жас шахматшыдан үстин келе алмады.

8 сааттан көбирек даўам еткен беллесиўдиң 114-жүриў жағдайында бир пияда үстинлигине ерискен Абдусатторовта жеңиў имканияты бар еди. Бирақ ФИДЕ тарийхында төртинши ең жас гроссмейстер атағына ерискен 14 жасар түркиялы шахматшы ҳүжимши позицияға өтип алғаны нәтийжесинде ушырасыў теңбе-тең жуўмақланды.

Бул турда шахматшыларымыздан Жавоҳир Синдоров ҳәм Жаҳонгир Воҳидов ер адамлар топарында ойнап атырған 2 шахматшы ҳаял-қыз – россиялы Александра Горячкина ҳәм ҳиндстанлы Дивя Дешмухни, Абдумалик Абдусалим әзербайжанлы Муҳаммад Мурадлыны жеңди.

Турнирде қатнасып атырған шахматшыларымыздан Нодирбек Ёқуббоев, Шамсиддин Воҳидов, Муҳиддин Мадаминов, Муҳаммадзоҳид Суяров қарсыласлары менен теңбе-теңликке еристи.

Ҳаял-қызлар арасындағы жарыста Гулдона Каримова ҳәм Мадинабону Халилова қара даналарда, Гүлрухбегим Тоҳиржонова ақ даналарда қарсыласларынан үстинликке еристи. Афруза Ҳамдамова ҳәм Умида Омонова болса қарсыласлары менен келисиў жолын таңлады.

Бүгин, 6-тур ойынлары алдында иранлы Парҳам Магсудлу 4,5 очко менен жеке жетекшиликти даўам еттирмекте. Иранлы шахматшы кеше өткен 5-тур ушырасыўында қара даналарда венгриялы Ричард Раппортты жеңди.

Бул турда жәҳән чемпионы Доммаражу Гукеш АҚШ ўәкили Абҳиманю Мишраға жеңилген жағдайда, турнирдиң биринши санлы қатнасыўшысы сыпатында классификацияланған Рамешбабу Праггнанандха ақ даналарда ҳәрекет еткен германиялы Маттхиас Блуебаумға тәслим болды.

6-тур ойынлары алдынан Парҳам Магсудлу 4,5 очко менен жетекшилик етип атырған жағдайда 4 қатнасыўшы 4 очко менен кейинги орынларды ийелеп тур. 11 қатнасыўшының есабында 3,5 балл бар. Олардың қатарында Нодирбек Абдусатторов ҳәм Нодирбек Ёқуббоев та бар.

Бүгин болып өтетуғын 6-тур ойынларында Нодирбек Абдусатторов қара даналарда өзи сыяқлы 3,5 очкоға ийе израильлы Максим Родштейн менен, Нодирбек Ёқуббоев ақ даналарда ҳиндстанлы Пранав пенен күш сынасады.

Шахматшы қызларымыздан Афруза Ҳамдамова қазақстанлы Бибисора Асоубаева менен, Гулдона Каримова украиналы Мария Музичук пенен беллеседи.

Ҳаял-қызлар топарында әзербайжанлы Улия Фаталийева, ҳиндстанлы Вайшали Рамешбабу, россиялы Катерина Лагно, германиялы Динара Вагнер 4 очко менен жетекшилик етпекте. Ўатанласларымыздан Афруза Ҳамдамова 3,5 балл менен қосымша көрсеткишлер бойынша 10-орынды, Мадинабону Халилова ҳәм Гулдона Каримова 3 балл менен 56 қатнасыўшы арасында 13-15-орынларды ийелеп тур.

Жарыслар 15-сентябрьге шекем даўам етеди.

Тўлқин Рўзиев, ӨзА