Өзбекстан, Қазақстан ҳәм Қырғыз Республикасы суў ҳәм энергетика тараўларындағы бирге ислесиўди буннан былай да раўажландырыў мақсетинде гезектеги ушырасыўды өткерди.

Энергетика министрлиги мәлимлеме хызметиниң хабар бериўинше, 7-сентябрь күни Шолпан-Ата қаласында усы мәмлекетлердиң энергетика ҳәм суў хожалығы министрлериниң қатнасыўында жумысшы мәжилис болып өтти.

Ушырасыў ўақтында гүзги-қысқы мәўсимде суў-энергетика системасының турақлы жумыс ислеўин тәмийинлеў, бар имканиятлардан нәтийжели пайдаланыў ҳәм өз-ара бирге ислесиў байланысларын және де беккемлеў мәселелери додаланды.

Тәреплер суў ресурслары ҳәм энергия тәмийнаты менен байланыслы әҳмийетли мәселелерди биргеликте шешиў зәрүр екенлигин атап өтти.

Атап өтилгениндей, үш мәмлекеттиң суў-энергетика тараўындағы тығыз бирге ислесиўи регионда турақлы раўажланыў ҳәм халықтың абаданлығын тәмийинлеўге хызмет етеди.

Сөйлесиўлер жуўмағында турақлы жумысшы топар мәжилислерин өткерип турыў бойынша келисимге ерисилди ҳәм тийисли протоколларға қол қойылды.

Н.Зиёдуллаева таярлады, ӨзА