Ózbekstan, Qazaqstan hám Qırǵız Respublikası suw hám energetika tarawlarındaǵı birge islesiwdi bunnan bılay da rawajlandırıw maqsetinde gezektegi ushırasıwdı ótkerdi.

Energetika ministrligi málimleme xızmetiniń xabar beriwinshe, 7-sentyabr kúni Sholpan-Ata qalasında usı mámleketlerdiń energetika hám suw xojalıǵı ministrleriniń qatnasıwında jumısshı májilis bolıp ótti.
Ushırasıw waqtında gúzgi-qısqı máwsimde suw-energetika sistemasınıń turaqlı jumıs islewin támiyinlew, bar imkaniyatlardan nátiyjeli paydalanıw hám óz-ara birge islesiw baylanısların jáne de bekkemlew máseleleri dodalandı.
Tárepler suw resursları hám energiya támiynatı menen baylanıslı áhmiyetli máselelerdi birgelikte sheshiw zárúr ekenligin atap ótti.
Atap ótilgenindey, úsh mámlekettiń suw-energetika tarawındaǵı tıǵız birge islesiwi regionda turaqlı rawajlanıw hám xalıqtıń abadanlıǵın támiyinlewge xızmet etedi.
Sóylesiwler juwmaǵında turaqlı jumısshı topar májilislerin ótkerip turıw boyınsha kelisimge erisildi hám tiyisli protokollarǵa qol qoyıldı.

N.Ziyodullaeva tayarladı, ÓzA