1-сентябрь күни Қытай Халық Республикасының пайтахты Пекин қаласында Өзбекстан Туризм офиси ашылды. Ашылыў мәресими жоқары дәрежедеги рәсмий сапар шеңберинде өткерилип, еки мәмлекет арасындағы дослық қатнасықлар, өз-ара исеним ҳәм стратегиялық шерикликтиң және бир айқын тымсалына айланды.

Өзбекстан Туризм офисинде Туризм комитетиниң баслығы Умид Шадиев, Қытай санаат ҳәм саўда федерациясының Пекин сыртқы мәдений саўда ассоциациясының атқарыўшы директоры Чи Лу ханым ҳәм Қытайдың ири туристлик компанияларының ўәкиллери қатнасты.

Пекинде ашылған Туризм офиси Өзбекстан ҳәм Қытай арасындағы туристлик байланысларды беккемлеўде әҳмийетли роль атқаратуғыны ҳәм Қытайдың ири туристлик компанияларының Өзбекстан базарына кириўине жәрдемлесетуғыны қәнигелер тәрепинен атап өтилди. Соның менен бирге, Туризм офиси сырт елли инвесторларға туризм тараўындағы имканиятлар ҳаққында толық мағлыўмат берип, жаңа жойбарларды әмелге асырыўда белсене қатнасады.

Өзбекстан Президенти Шавкат Мирзиёев ҳәм Қытай Халық Республикасы Баслығы Си Цзиньпинниң басламалары себепли еки тәреплеме байланыслар кейинги жылларда жаңа басқышқа көтерилгенин атап өтиў керек. Атап айтқанда, туризм тараўында да өз-ара бирге ислесиў жедел пәтлерде раўажланбақта. Буны 2025-жыл 1-июньнен күшке кирген 30 күнлик визасыз режим, сондай-ақ, еки мәмлекет арасында ҳәптесине 50 ден аслам авиақатнаўлардың жолға қойылғаны анық көрсетип тур. Жақын жылларда бул көрсеткишти 100 рейске шекем арттырыў режелестирилген.

Буннан тысқары, 2025-жыл “Қытайда Өзбекстан туризм жылы” деп жәрияланғаны да еки мәмлекет арасындағы туризм бирге ислесиўин беккемлеўге хызмет етпекте. Усы жыл даўамында Өзбекстан делегациясы Қытайдың 9 ири қаласында родшоулар өткерди, туристлик көргизбелерде белсене қатнаспақта, жылдың ақырына шекем және бир қатар провинцияларда презентация илажлары режелестирилген.

Өзбекстан тәрепи 2030-жылға барып Қытайдан мәмлекетке келиўши туристлердиң санын 3 миллионға жеткериўди мақсет еткен. Пекиндеги жаңа туризм офиси болса усы үлкен мақсетке қарай тасланған әҳмийетли қәдемлерден бири болып есапланады.

Мәресим жуўмағында Өзбекстан ўәкиллери барлық қатнасыўшыларды елимизге саяхат етиўге мирәт етип, Өзбекстан қытайлы туристлер ушын ашық ҳәм қолайлы жөнелислерден бири болып қалатуғынын атап өтти.

ӨзА