1-sentyabr kúni Qıtay Xalıq Respublikasınıń paytaxtı Pekin qalasında Ózbekstan Turizm ofisi ashıldı. Ashılıw máresimi joqarı dárejedegi rásmiy sapar sheńberinde ótkerilip, eki mámleket arasındaǵı doslıq qatnasıqlar, óz-ara isenim hám strategiyalıq sherikliktiń jáne bir ayqın tımsalına aylandı.

Ózbekstan Turizm ofisinde Turizm komitetiniń baslıǵı Umid Shadiev, Qıtay sanaat hám sawda federaciyasınıń Pekin sırtqı mádeniy sawda associaciyasınıń atqarıwshı direktorı CHi Lu xanım hám Qıtaydıń iri turistlik kompaniyalarınıń wákilleri qatnastı.
Pekinde ashılǵan Turizm ofisi Ózbekstan hám Qıtay arasındaǵı turistlik baylanıslardı bekkemlewde áhmiyetli rol atqaratuǵını hám Qıtaydıń iri turistlik kompaniyalarınıń Ózbekstan bazarına kiriwine járdemlesetuǵını qánigeler tárepinen atap ótildi. Sonıń menen birge, Turizm ofisi sırt elli investorlarǵa turizm tarawındaǵı imkaniyatlar haqqında tolıq maǵlıwmat berip, jańa joybarlardı ámelge asırıwda belsene qatnasadı.
Ózbekstan Prezidenti Shavkat Mirziyoev hám Qıtay Xalıq Respublikası Baslıǵı Si Czinpinniń baslamaları sebepli eki tárepleme baylanıslar keyingi jıllarda jańa basqıshqa kóterilgenin atap ótiw kerek. Atap aytqanda, turizm tarawında da óz-ara birge islesiw jedel pátlerde rawajlanbaqta. Bunı 2025-jıl 1-iyunnen kúshke kirgen 30 kúnlik vizasız rejim, sonday-aq, eki mámleket arasında háptesine 50 den aslam aviaqatnawlardıń jolǵa qoyılǵanı anıq kórsetip tur. Jaqın jıllarda bul kórsetkishti 100 reyske shekem arttırıw rejelestirilgen.
Bunnan tısqarı, 2025-jıl “Qıtayda Ózbekstan turizm jılı” dep járiyalanǵanı da eki mámleket arasındaǵı turizm birge islesiwin bekkemlewge xızmet etpekte. Usı jıl dawamında Ózbekstan delegaciyası Qıtaydıń 9 iri qalasında rodshoular ótkerdi, turistlik kórgizbelerde belsene qatnaspaqta, jıldıń aqırına shekem jáne bir qatar provinciyalarda prezentaciya ilajları rejelestirilgen.
Ózbekstan tárepi 2030-jılǵa barıp Qıtaydan mámleketke keliwshi turistlerdiń sanın 3 millionǵa jetkeriwdi maqset etken. Pekindegi jańa turizm ofisi bolsa usı úlken maqsetke qaray taslanǵan áhmiyetli qádemlerden biri bolıp esaplanadı.
Máresim juwmaǵında Ózbekstan wákilleri barlıq qatnasıwshılardı elimizge sayaxat etiwge mirát etip, Ózbekstan qıtaylı turistler ushın ashıq hám qolaylı jónelislerden biri bolıp qalatuǵının atap ótti.

ÓzA