Өзбекстан Республикасы Президенти Шавкат Мирзиёев 30-август күни Беларусь Республикасы Президенти Александр Лукашенко менен телефон арқалы сөйлести.

Мәмлекетимиз басшысы Беларусь жетекшисин туўылған күни менен қызғын қутлықлап, оған беккем денсаўлық, бахыт-ығбал ҳәм табыслар, дос Беларусь халқына тынышлық-татыўлық ҳәм раўажланыў тиледи.

Беларусь Президенти, өз гезегинде, Өзбекстан жетекшисин ҳәм көп миллетли халқын жақынласып киятырған Ғәрезсизлик күни менен қызғын қутлықлап, турақлы раўажланыў тиледи.

Александр Лукашенконың өткен жылы февраль айында Өзбекстанға сапары даўамында ерисилген келисимлерди әмелге асырыў шеңберинде Өзбекстан – Беларусь көп тәреплемели шериклик қатнасықларын буннан былай да кеңейтиў мәселелери додаланды.

Ҳәр қыйлы дәрежелердеги сөйлесиўлер ҳәм алмасыўлар нәтийжели болып атырғаны қанаатланыўшылық пенен атап өтилди. Товар алмасыў көлеми жыл басынан берли 30 процентке артты. Жетекши кәрханалардың аўыл хожалығы, электротехника, машина қурылысы, тоқымашылық ҳәм басқа да тармақлардағы кооперация жойбарлары әмелге асырылмақта. Парламентлераралық, исбилерменлик ҳәм мәдений-гуманитарлық байланыслар жедел раўажланбақта.

Өзбекстан ҳәм Беларусь жетекшилери болажақ еки тәреплеме ушырасыў ҳәм илажлар режесин де көрип шықты.

ӨзА