Ózbekstan Respublikası Prezidenti Shavkat Mirziyoev 30-avgust kúni Belarus Respublikası Prezidenti Aleksandr Lukashenko menen telefon arqalı sóylesti.

Mámleketimiz basshısı Belarus jetekshisin tuwılǵan kúni menen qızǵın qutlıqlap, oǵan bekkem densawlıq, baxıt-ıǵbal hám tabıslar, dos Belarus xalqına tınıshlıq-tatıwlıq hám rawajlanıw tiledi.
Belarus Prezidenti, óz gezeginde, Ózbekstan jetekshisin hám kóp milletli xalqın jaqınlasıp kiyatırǵan Ǵárezsizlik kúni menen qızǵın qutlıqlap, turaqlı rawajlanıw tiledi.
Aleksandr Lukashenkonıń ótken jılı fevral ayında Ózbekstanǵa saparı dawamında erisilgen kelisimlerdi ámelge asırıw sheńberinde Ózbekstan – Belarus kóp táreplemeli sheriklik qatnasıqların bunnan bılay da keńeytiw máseleleri dodalandı.
Hár qıylı dárejelerdegi sóylesiwler hám almasıwlar nátiyjeli bolıp atırǵanı qanaatlanıwshılıq penen atap ótildi. Tovar almasıw kólemi jıl basınan berli 30 procentke arttı. Jetekshi kárxanalardıń awıl xojalıǵı, elektrotexnika, mashina qurılısı, toqımashılıq hám basqa da tarmaqlardaǵı kooperaciya joybarları ámelge asırılmaqta. Parlamentleraralıq, isbilermenlik hám mádeniy-gumanitarlıq baylanıslar jedel rawajlanbaqta.
Ózbekstan hám Belarus jetekshileri bolajaq eki tárepleme ushırasıw hám ilajlar rejesin de kórip shıqtı.

ÓzA