Аўыл хожалығы – Өзбекстан экономикасының тийкарғы тармақларынан бири болып, овощ жетистириў тараўы бул бағдарда айрықша әҳмийетке ийе. Халықтың азық-аўқат қәўипсизлигин тәмийинлеў, экспорт потенциалын арттырыў ҳәм жергиликли базарды толықтырыўда овощ өнимлерин жетистириў әҳмийетли орын ийелейди.

Миллий статистика комитетиниң мағлыўматларына бола, 2025-жылдың январь-июнь айларында республикадағы барлық категориядағы хожалықлар тәрепинен 3,8 миллион тонна овощ жетистирилген. Бул көрсеткиш жылдан-жылға артып баратырғаны аграр тараўдың раўажланыўын белгилейди.

Аймақлар кесиминде жетистирилген овощ егинлериниң көлеми төмендегише: Сурхандәрья ўәлаяты – 719,7 мың тонна, Әндижан ўәлаяты – 670,7 мың тонна, Ферғана ўәлаяты – 511,8 мың тонна, Ташкент ўәлаяты – 375 мың тонна, Самарқанд ўәлаяты – 340,8 мың тонна, Наманган ўәлаяты – 297,7 мың тонна, Бухара ўәлаяты – 291,4 мың тонна, Қашқадәрья ўәлаяты – 205 мың тонна, Хорезм ўәлаяты – 126,8 тонна, Сырдәрья ўәлаяты – 85,5 мың тонна, Наўайы ўәлаяты – 76,4 мың тонна, Жиззақ ўәлаяты – 63,9 мың тонна, Қарақалпақстан Республикасы – 59,9 мың тонна.

2025-жылдың биринши ярым жыллығы жуўмақларына бола, Өзбекстанда овощ жетистириў турақлы өсиўде даўам етпекте. Сурхандәрья, Әндижан ҳәм Ферғана ўәлаятлары мәмлекеттиң овощ жетистириў бойынша тийкарғы таяныш аймақларына айланған. Бул аймақлар тек ғана ишки базарды емес, ал экспортты да жетерли дәрежеде тәмийинлеў имканиятына ийе. Соның менен бирге, басқа ўәлаятларда да тараўға итибарды күшейтиў арқалы өнимдарлықты арттырыў, жаңа агротехнологияларды енгизиў ҳәм азық-аўқат қәўипсизлигин беккемлеў зәрүр.

Дилдора ДЎСМАТОВА.

ӨзА