Өзбекстан Президенти Шавкат Мирзиёев Украина Президенти Владимир Зеленскийди Украинаның миллий байрамы – Ғәрезсизлик күни мүнәсибети менен қутлықлады. Бул ҳаққында Украина жетекшиси өзиниң Х‘тағы бетинде мәлим етти.

Владимир Зеленский Шавкат Мирзиёевқа миннетдаршылық билдирген ҳалда усы қутлықлаў хаты сүўретин жәриялаған.

“Украинаның миллий байрамы – Ғәрезсизлик күни мүнәсибети менен сизди ҳәм пүткил Украина халқын қызғын қутлықлайман. Мәмлекетлеримиз арасындағы дәстүрий дослық ҳәм узақ мүддетли бирге ислесиў принциплерине тийкарланған байланыслар келешекте де халықларымыздың улыўма мәплери жолында раўажланып бара беретуғынына исенемен.

Пурсаттан пайдаланып, Сизге беккем денсаўлық, шаңарақлық бахыт-ығбал, жуўапкершиликли жумысыңызда табыслар, Украина халқына болса тынышлық-аманлық ҳәм абаданлық тилеп қаламан”, делинген Өзбекстан Президентиниң қутлықлаў хатында.

Зеленский, өз гезегинде, Өзбекстан ҳәм Украина арасында нәтийжели бирге ислесиўди избе-из раўажландырыў ҳәм еки тәреплеме қатнасықларды дос халықлар мәпи жолында беккемлеўге исеним билдирген.

“Мен Украинаныӊ аймақлық пүтинлиги мәселесиндеги Сизиң позицияңызды ҳәм украиналы балаларды Өзбекстанда саламатландырыўға қаратылған инсаныйлық басламаларыңызды жоқары қәдирлеймен”, деп жазған Украина Президенти.

Қарақалпақстан хабар агентлиги